Dagboek van Gent van 1447 tot 1470. Deel 2

[Verbintenis aangegaan door de stad Dendermonde tegenover Gent, Brugge, Ieperen en het land van Vlaanderen].

⁺ ‘Wy scepenen, raet, ghezwoornen ende al 't commuun van der poort van Dendermonde, doen te wetene allen lieden, dat

+ f^o 157 v^o

[p. 95]

alle discoorden gheweest tusschen den drie steden Ghendt, Brugghe ende Ypre ende den ghemeenen lande van Vlaendren in d'een zyde, ende ons, onser poort van Dendermonde ende die ons toebehooren an d'andre zyde, van den welcken een vriendelic accoord, paeys ende zoendync ghemaect es ende zegghene gheseyt zyn by eenen wel hooghen, wel moghenden ende wel edelen prince heere Jan, by der gracien Gods, hertoghe van Lothryc, van Brabant, van Limborch, ende marcgrave des helichs rycx, alzo die ghescriften daer up ghemaect inhebben ende verclaersen, zo hebben wy ghezwooren alle ghemeenelic ende zweeren over ons, over onse poort, over die ons toebehooren, over onse naercommers ende over elcken van ons, by onsen trauwen, by onser loyalheden ende by onsen eede, openbaerlic ghedaen up de maerct van Dendermonde, daer up dat wy alle vergadert waren, dat wy ons ende elc van onslieden wel ende ghetrauwelic draghen zullen ten eeuwelicken daghen in allen zaken tjeghen de voorscreve drie goede steden ende 'd lant van Vlaendren ende en zullen nemmermeer jeghen hem stellen, setten, noch ons contrarie maken, noch wesen in negheene zaken, in rade noch in dade, omme gheens persoons wille ende gheene zaken die ghevallen es oft ghevallen mach, ende al in der zelver manieren hebben wy ghezwooren ende zweeren, in den name van ons, van die ons toebehooren, ende van onsen naercommers ende van elcken onser zonderlynghen, te houdene ende te vulcommene t'eeuwelicken daghen wel ende ghetrauwelic, alle de verbanden, alianchen ende voorwaerden ende elc poynt by hem die ghemaect, gheordonneert ende ghezwoornen zyn tusschen den voorscreven heere den hertoghe ende zynen lande van Brabant, an d'een zyde, ende wel hoghe, wel moghende ende wel edelen prince, onsen wel gheduchten souverain heere, Lodewyc, grave van Vlaendren, van Nevers ende van Rethel ende zynen lande van Vlaendren ghemeenlic, an d'andre zyde, in alder zelver manieren dat se die voorscrevene⁺ drie steden ende 'd lant van Vlaenderen ghezworen hebben ende die ghescriften daerup ghemaect wel ende vulmaectelic

+ f^o 158 r^o

[p. 96]

expressere inhebben. In oorconscepen ende kennelicheden van deser dynghen, hebben wy den grooten zeghele onser poort van Dendermonde doen hanghen an dese lettren uuthanghende. Dwelcke was ghedaen ende ghezworen in die presentie van edelen ende machteghen lieden, heere Jan Wyfvliet, heere van Blaesvelt; heere Gillis van Quaetrebbe, heere van Berghen; Jan, proost van Arnhem ende raed ons heeren voorseit, ende in die presentie van vele goede souffysanten lieden, boden der voorscrevene drie goeden steden ende 's lands van Vlaendren, daertoe van haren weghen gheordonneert ende ghesendt binnen onser poort voorseit, 's donderdaeghs den XI^en in ougsten, in 'tjaer ons Heeren doe men screef duust drie hondert ende XLV.’