Dagboek van Gent van 1447 tot 1470. Deel 2

[p. 93]

Copie van den upnemene tusschen den drie steden van Vlaendren ende der stede van Dendermonde⁽¹⁾.

‘Allen den ghenen die desen brief selen zien ende hoeren lesen, scepene, gheswoerne ende alle de goede liede ghemeynlec van der poort⁽²⁾ van Denremonde, groet met kennissen der waerheyt. Cont si allen lieden dat wi met desen openen brieve mechtech ghemaect hebben ende maken mechtech enen hoghen moghende prince, Janne, by der gracien ons Heeren, hertoghe van Lother, van Brabant, van Lymborgh ende marcgrave des heyleghs rycs, onsen lieven ende gheminden heere, van allen twisten, discorden ende saken, nyt ute ghesceden in so wat⁺ maniren die ghevallen moghen syn in tiden die leden syn tot up den dach van heden tusschen die goede stat van Ghend ende dlandt van Vlaenderen, in d'een side ende ons in d'andre side, die saken, twisten ende discorde, te slitene, te satene⁽³⁾, te acorderen ende een segghen⁽⁴⁾ daer ute te segghene na synre hoecheyt, beschedenheyt ende na syn goetdunken, ende wat dat hi daer uijt segghen sal ende ordineren, dat gheloeven wi ende sekeren in goeder ende in ganser trauwen, voer ons ende de voorseyde poert, vast ende ghestedech te houdene t'eweliken daghen in allen sinen ponten, sonder breken ende engheenrehande arghelist daer jeghens te sokene in enegher maniren.

(1) De drie volgende stukken zijn hier waarschijnlijk ingelascht wijl men ze op de dagvaart van Rijsel voordroeg (f^o 164 v^o). Die copie werd verheterd volgens het oorspronkelijke stuk berustend op het Gentsch Stadsarchief (N^r 406 van het Inventaire van Van Duyse). Door eenen anderen brief (N^r 405 van hoogergezegd archief) verleent hertog Jan III aan zijnen broeder Jan heer van Wijfvliet en Blasvelt en zijne raadsheeren Gillis van Quaetrebbe, heer van Bergen, den drossaert van Brabant Geeraert van der Heyden, aan ridder Jan van Meldert en aan Jan den proost van Aarnhem, volmacht om het geschil tusschen de stad Genten aanhangers en de stad Dendermonde opgerezen te slechten. Reeds afgedrukt evenals de volgende akten in de verhandeling van M. Heins, Gand contre Termonde, Termonde, 1897.

(2) Poort, stad.

+ f^o 157 r^o

(3) Te satene, te vereffenen.

(4) Segghen, uitspraak, scheidsvonnis.

[p. 94]

Ende om de meerre stedecheyt ende zekerheyt onser voerscrevene heeren den hertoghe hier af te doene, soe bidden wi hem, Ingergier, heere van Ambayse ende van Denremonde, onsen lieven ende gheminden heere sonder middel⁽¹⁾, ende enen hoghen moghenden heere Lodewyc, graeve van Vlaendren, van Nevers ende van Rethel, onsen oversten ende souvereynen heere, dat si, in tekenen huers consens ende willen alle de dinghe voerscreven, heren seghelen willen hanghen aen desen brief metden onsen. Ende wi Ingergier heere van Ambayse ende van Dendermonde, ende wy Lodewyc, greve van Vlaendren, van Nevers ende van Rethel, om beden, wille ende versoec der voerscrevene scepenen, ghesworne ende alle der goeder liede van der poert van Denremonde, ende want wi alle dese voerscrevene dinghen consenteren, loeven ende volghen⁽²⁾ ende den voorscreven hertoghe met onsen voerscreven stat van Denremonde, alle saken ghelyc dat si hem dierre gheloeft ende volght, oec in der zelver manieren gheloeven ende volghen, also voorscreven es, soe hebben wi onse seghelen, dat's te verstaen, wi greve van Vlaendren voerseit, onsen heymeleken seghel, overmids absentie ons anders seghels, doen hanghen an dese jeghenwordeghe lettren, metten zeghele onser poert voorscreven. Ghegheven op Sente Laurentius dach⁽³⁾, in 't jaer ons Heeren dusentich driehondert ende vive ende veertech’.

(1) Heere zonder middel, onmiddellijken heer.

(2) Loeven ende volghen, beloven en bewilligen.

(3) 10^en Oogst. Aan deze akte hangen: een bruine zegel der schepenen van Dendermonde, een roode zegel van Ingergier heer van Ambaize, een roode zeer kleine zegel van Lodewijk van Male.