Dagboek van Gent van 1447 tot 1470. Deel 2

't Slot dat van den submissien zyn zoude.

‘Wy scepenen, dekenen, raet ende al 't ghemeene van der⁺ stede van Ghendt, begheerende met al onser herten den paeys ende te commene in de gracie van onsen gheduchten Heere ende prince, hebben gheweest ende zyn ghepaeyt van al den inhaudene ende effecte van der cedulle hier onder gheincorporeert ende ghescreven ende al ende elc artycle begrepen in de zelve cedule, willen, consenteren ende accorderen ende wy zyn's ghesubmitteert ende gheobligiert, submitteren ende obligieren ons by desen presenten in alder manieren ende voormen dat begrepen ende verclaert es in de voorscreve cedulle ende hebben belooft ende beloven, by trauwen ende eede van onsen lichame ende up de obligatie van al onsen goede, van der voorscrevene stede, jeghenwoordich ende toecommende, hoedanich het zy, t'houdene ende te vulcommene in effecte al 't inhouden van der voorscrevene cedulle ende al 't ghuendt dat by den voorscreven ambassadeurs zal zyn gheseyt, gheordonneert ende gheappoynteert, alzo voorseyt es, alle sollempnyteyten van ghedynghe ter neer gheworpen ende achterghestelt, zonder nemmermeer daer jeghen te commene by eeneghen weghen ofte maniere dat zy of weten mach, renunchierende by expresse tot alle allegatien, exceptien, redenen ende alle andere zaken die wy zauden moghen zegghen, scriven oft voorstellen in eenegher manieren. In kennessen, enz.’

+ f^o 140 v^o