Dagboek van Gent van 1447 tot 1470. Deel 2

Tractaet.

Item, 'ts vrindaechs was te gadere ghedaen de Collatie up de poynten die de ghedeputeerde overbrocht hadden ende hemlieden ghegheven waren te Dendermonde by den ambassadeurs van den Coninc⁽⁴⁾, welcke poynten waren dusdanich: ‘Het⁺ dynct eeneghen behoorlic omme te commene ten paeyse van der oorloghen ende van den questien ende gheschillen nu wesende tusschen mynen Heere van Bourgoyngnen ende die van zynder stede van Ghendt, ghedaen te wesene van der zyde van die van Ghendt 't ghuendt dat hier naer volght:

Eerst, dat zy bekennen ende belyen mesdaen hebbende ende grootelicx mesgrepen jeghens mynen voorscreven gheduchten Heere van Bourgoyngnen ende zynder heerlicheden, dat hemlieden leed es ende beraudt, zullen hem ghenade bidden

(4) Vgl. Chastellain, Chroniques, D. II, blz. 327; volgens de Kronijk, D. II, blz. 154, geschiedde dit op Dinsdag 4 Juli, wat overigens gestaafd wordt door de dagteekening van den brief op blz. 53.

+ f^o 136 v^o

[p. 49]

ende supplieren in alle oodmoedichede dat zyn gheliefte zy hemlieden te verghevene ende weder te stellene in zyne goede gracie, ende hier toe zullen zy zulcke woorden zegghen ende in zulcker manieren als gheadvyseert zullen werden by den ambassadeurs van den Coninc.

Item, dat de voorscrevene van Ghendt zullen zegghen ende presenteren mynen voorscreven Heere van Bourgoyngnen dat zy ghepaeyt zyn hem te repareerne ende beterne haerlieder voorscreven mesgrypen met zulcken reparatien ende beterynghe als behoorlic gheadvyseert zullen werden by den voorscreven ambassadeurs.

Item, den voorscrevene van Ghendt zal ghereserveert wesen by den voorscreven ambassadeurs, ghehoort t' zyne by hemlieden in al huerlieder justificatien, excusatien ende bescudden die zy zullen willen zegghen ende voortstellen, omme daer inne zulcke voorzienichede te hebbene, annopende den voorscreven reparatien ende beterynghe, als 't behooren zal.

Item, dat van den questien ende ghescillen, wesende tusschen mynen voorscreven gheduchten Heere van Bourgoyngnen ende den voorscreven van Ghendt, annopende den vernyeuwynghe van der wet van der zelver stede, haerlieder uutsetene poorters⁽¹⁾, der kennessen ende jurisdictien van den officiers van mynen voorscreven Heere, den banne ende becondeghen ter veynstren ende van den anderen poynten daer questie ende gheschil af es, tusschen mynen voorscreven Heere van Bourgoyngnen ende hemlieden, ende daer af men zegghen wille dat zy onduechdelic ghehuuseert hebben boven ende jeghen 't inhauden van haren prevylegien ende jeghen haerlieder eede⁺ ende de voorscrevene van Ghendt ghepaeyt zullen wesen dat zy sommierlic⁽²⁾ ghehoort zynde ende zonder voorme van ghedynghe voor de voorscrevene ambassadeurs, by hemlieden daer af gheappoyntiert ende gheordonneert zy, alzo zy beseffen zullen dat behooren zal by rechte.

(1) Haag- of buitenpoorters, tegenover de ‘insetene’ poorters.

+ f^o 137 r^o

(2) Sommierlic, sommairement, bondig.

[p. 50]

Item, dat van den kennessen, presentacien, submissien ende andren zaken boven ghezeyt, by scepenen van beede de bancken, den dekenen ende den ghemeenen volcke van deser stede ghepasseert zullen werden lettren in duechdelicker voormen gheteeckent by den cleercken van der voorscrevene stede ende gheseghelt metten grooten zeghele der voorscrevene stede ende der ghemeente van Ghendt, by den welcken zy hemlieden submitteren ende beloven te doene in effecte de zaken boven ghenoumt ende elc van diere zonderlynghe ende te obedierne te dien dat by den voorscrevene ambassadeurs gheappoyntiert ende gheordonneert zal wesen in dese maniere ghelyck voorscreven es.

Item, dat in de zaken voorscreven doende, de voorscrevene ambassadeurs hebben meenynghe dat men middele vinden zal te hebbene bestant oft uphauden van oorloghen van goeden redelicken tyde, binnen den welcken goede conclusie ghenomen zal werden in de materie.

Item, als van der plaetse omme te besoeyngierne, 't schynt dat de voorscrevene van Ghendt hem dies sculdich zyn te ghedraghene ende te stellene ter goeder ghelieften van mynen voorscreven Heere.’

Item, voorts zo wasser een lettre ghezonden by den ambassadeurs, inhaudende aldus:

‘Harde lieve broedren ende spetiale vrienden, wy ghebieden ons te hu zo wy meest moghen. Ende ulieden ghelieve te wetene dat ulieden ambassadeurs ons hebben te kennen ghegheven 't ghuent dat t' haerlieder vertreckene by hulieden ghedelibereert waert omme te besoeyngierne ter paeysieringhe, questien ende gheschillen ende weghen van fayte tusschen mynen Heere van Bourgoyngen ende ulieden ende onslieden; heeft ghetoocht⁺ omme zekerlic te besoyngierne daer inne, ter welvaert van hulieden, dat wel behoorlic zoude wesen te doene eeneghe verclaerynghe up eeneghe van uwen voorscreven deliberatien. Ende insghelycx hebben wy ghehandelt de deliberatie van ulieden voorscreven, met mynen heeren van den Rade van

+ f^o 137 v^o

[p. 51]

mynen voorscreven Heere den hertoghe, die daer inne groote zwaerichede ghemaect hebben, ende daer omme heeft den advys ghemaect gheweest in ghescrifte, dwelcke uwe voorscrevene ambassadeurs hu brynghen, ten fyne dat ghylieden zo ghy neerenstelic muecht daer inne draecht hulieden consent; daer up zuldy breedre van als gheinformeert zyn by den voorscreven meester Gillis ende meester Jan⁽¹⁾. Ende ons dynct dat ghylieden zonder zwaerheyt sculdich zyt te doene, consenteerne ende accoordeerne 't inhouden van den voorscreven memorien ende advyse ende dat ghylieden by [vriendelicken] middele zult moghen commen ter goeder conclusie van paeyse, ende ghy muecht hulieden wel zeker hauden dat wy ons altyts voughen zullen ter welvaert van ulieden ende ter bewaernessen van uwen rechten, prevylegien, costumen ende usagien ten besten dat wy zullen moghen. Harde lieve broeders ende spetiale vrienden, laet ons weten 't ghuendt dat hulieden ghelieven zal ende wy zullen 't doen met goeder herten by den ghelieften Ons Heeren die u gheve vulcommynghe van uwer goeder begheerten. Ghescreven te Dendermonde, den III^en dach van hoymaent.

“An onse broeders ende spetiale vrienden, scepenen, dekenen ende al 't ghemeente van Ghendt.

De uwe, de seneschael van Poitau, de archidiaken van Tours, de procureur generael van den Coninc.”

Item, hier up wart by den drie Leden van deser stede ghesloten ende gheconsenteert een submissie ende een lettre missive, sprekende beede aldus:

(1) Gillis Baudins, advocaat der keurbank; Jan van der Eecken, advocaat van gedeele.