Dagboek van Gent van 1447 tot 1470. Deel 1

Andwoorde up den zelven brief van der stede van Brugghe.

‘Eersame, wyse, lieve ende gheminde vrienden, de hooftmannen, scepenen, raedt, beede de dekenen ende al 't ghemeene commune van der stede van Ghendt, burchmeesters, scepenen, raedt, hooftmannen, dekenen ende ghezwoornen van der stede van Brugghe, saluut ende alle vrientscepe. Lieve ende gheminde vrienden, wy hebben ontfanghen uwe beslotene lettren, by uwen bode, bryngher van deser, inhebbende in substantien dat ghy langhe gheweest hebt ende noch zyt in de gramscepe ende onweertscepe van onsen harden gheduchten

[p. 322]

Heere, dwelcke ghespruut es by den ontzegghene van den verzoucke van den saute an hu ghedaen, ende hoe dat ghy met allen gestelt zyt buuten justicien, want hu de heere te diverschen waerften gheweert heeft ghezyn ende al noch es; ende hoe wel dat ghy te meer stonden by notablen persoonen gheestelic ende weerdelic hebt doen bidden den zelven onsen gheduchten Heere dat hem ghelieven wilde u te verleenene zyne baellius ende officiers van zynen weghen, omme recht, wet ende justicie te doene, elc naer zyne verdiente, niet min ghy en hebt nyet connen verweerven met beden, vrienden noch andersins, in wat manieren dat ghy t'anne gheleyt hebt, daer ghy jammerlic ende deerlic an zyt. Maer dat meer ende hu druckelicxt van al es, ghy verhoort daghelicx vele quade tydynghe, als dat onse gheduchte Heere ulieden ende dit land meent te veroorloghene by quaden rade, daer toe verzouckende secours in diverschen plaetsen; ende begheert an ons ten slote dat ons ghelieven⁺ wille te overziene wat duechden, wy ende alle de insetenen van desen lande van Vlaendren doen moghen, by u te blyvene ende ghy by ons, eendrachtelic, in broederlicker minnen en bystandicheden, zonder eeneghe partielichede te voedene oft betooghene te elcandren waert, ende negheen vremt volc van wapenen te latene oft ghedooghene commen binnen der stede oft t'eeneghen plaetsen in onse moghenthede, omme den lande oft eenich inder, grief oft scade te doene, noch oock te ghedooghene eeneghe mandementen uutgheroupen te werdene binnen deser zelver stede ende onse moghenthede, daer af te sommeghe plaetsen intert ghedaen es, met meer woorden in uwe voorschrevene lettren begrepen, begheerende onse voorschrevene andwoorde by uwen bode. Waer up, lieve ende gheminde vrienden, hu ghelieve te wetene dat ons met herten leet es die onghenouchte die es tusschen onsen gheduchten Heere ende ulieden, ende wilden wel dat ghy in die zaecke wildet weercken by goeden rade ende u voughen met alder oodmoedicheden, omme te vercryghene de gracie ende ghenade van den zelven onsen gheduchten Heere, zonder meer nyeu-

+ f^o 108 r^o

[p. 323]

wicheden of fayten te doene, daer toe wy metten prelaten, edelen ende andre lieden van dezer lande gheerne ende hertelic aerbeyden willen, beseffende ulieden daertoe gheneghen zynde metter daet, alzo ghy scryft dat ghy zyt, zonder cost, moeyenesse ofte aerbeyt te spaerne, biddende Gode van hemelrycke dat hy daer toe zyne gracie verleenen wille. Ende omme hu breedere te verandwordene, es waer dat up den dach van ghisteren, harde hooghe ende moghende prinche, myn heere de grave van Estampes⁽¹⁾, ons zeker zaken te kennen gaf van ons voorseyts gheduchts Heeren ende prinche weghe, angaende de voorschreve materie, daer up wy up heden vergadert hebben ghezyn elc in 't zyne ende metten zynen, ende hem eendrachtelic verandtwoordt dat wy, als ghetrauwe onderzaten, altyts blyven willen in goeden onderdanicheden ende dese zyne stede behouden ende bewaren in zyne obedientie, goeden paeyse ende ruste, ende t'zynen behouf, by den hulpe ende gratie van Gode⁺ ende den goeden lieden van deser stede, den zelven myn heere van Stampes in 't principale doende zekere verzoucken ende beden by hem ghedaen te zyne an onsen voorseyden gheduchten Heere ende prinche, omme den paeys, welvaert ende eendrachticheyt van deser lande, de welcke hopen curtelic commen zullen t'uwer kennesse ende daer af wy als nu ons verdraghen te scrivene, omme zekere redenen ons daer toe porrende ende totter tydt dat wy wat anders vernemen zullen, ulieden jonstelic ende met innegher herten biddende dat wel overmeerckende wat duechden commen ende ghescien, als onderzaten van eenen prince hemlieden draghen t'hemwaerts in goeden onderdanichede, ende wat vreesen, moeyten van herten ende grooten inconvenyenten gheschien ter contrarien als onderzaten leven in overhooricheden ende domineren willen jeghens haren Heere, ghy ulieden voughen wilt als boven by goeden rade te commene in de gracie van onsen voorscreven gheduchten Heere

(1) De brief der Gentenaars was dus te laat gekomen; hertog Philips had hunne inzichten voorkomen door zijnen neef naar Brugge te zenden.

+ f^o 108 v^o

[p. 324]

ende prince. Twelcke hu verleenen wille God almachtich, die hu bewaren wille in zalicheden. Ghescreven den XXVIII^e dach van maert, anno LI, enz.’

‘Eersame, wyse ende voorzieneghe, onsen lieven ende wel beminden vrienden, de hooftmannen, scepenen, raedt, beede de dekenen ende al den ghemeenen commune van der stede van Ghendt ende elcken zonderlynghe.’⁽¹⁾

(1) Zie verder het antwoord van Doornik, f^o 111 r^o. - Het antwoord van den hertog op die brieven door de Gentenaars in Vlaanderen rondgestuurd was zijn manifest tegen Gent van 31 Maart 1452, afgedrukt bij Gachard, Collection de Documents Inédits, D. II, bz. 96-111.