Dagboek van Gent van 1447 tot 1470. Deel 1

[p. 318]

Andwoorde van der stede van Dendermonde.

‘Eerweerdeghe, wyse ende voorzieneghe, harde lieve ende zeer gheminde vrienden, wy hebben ontfanghen uwe beslotene lettren, inhoudende vele diversche poynten ende onder andre de groote reverentie, weerdichede ende obedientie die wy daer inne verstaen, die ghy toescrivende zyt onsen harden lieven ende gheduchten Heere ende prinche, dwelcke goet ende minnelic es omme anhooren. Ende omme u up hu scriven te andwoordene, zo ghelieve u te wetene dat wy alle t'samen om hu zyn ende omme de goede stede van Ghendt wel ende ghetrauwelic naer onsen aermen vermoghene, evenverre emmers dat nyet en zy contrarie onsen gheduchten Heere ende prinche, in wiens obedientie wy altyts staen ende wesen willen, ghemeerct dat hy es onse gherechte Heere ende prinche. Ende als van den vremden volcke daer ghy scryft negheen inne te nemene die hu oft dlant inderen mochten, ghelieve u te wetene dat wy tot noch gheen vremt volc en hebben ghehadt, noch inne ghenomen, ende dat wy vernamen dat onse ghenadeghe Heere ende prinche bewilt worde hier inne te zendene vremt volck van wapenen, Walen oft Pycaerden, in achterdeele van u, van der stede van Ghendt ofte van den lande, daer af zouden wy bidden vriendelic ende daer omme trecken by onsen gheduchten Heere, hopende dat by uwer eerbaerheyt, ghy uwe goede lieden ghemeenelic zo wilt onderwysen, als dat alle zaken mochten by der gratien Gods commen t'eenen goeden paeyse⁺ ende concordie omme de preservatie ende behaudenesse van den goeden lande van Vlaendren, hebbende voor ooghen den weerden heleghen tyt⁽¹⁾, die jeghenwoordich es, met al onsen vermoghene zo willen wy begheerlic ons employeren ende daertoe ghehulpich zyn. Dat kenne God die hu, eerweerdeghe, wyse ende voorzieneghe, harde ende lieve ende zeer beminde vrienden, altyts bewaren wille. Ghescreven den laesten in maerte, anno LI.’

+ f^o 106 r^o

(1) Men was in den vasten.