Dagboek van Gent van 1447 tot 1470. Deel 1

Andwoorde van der stede van Audenaerde ende van Pamele.

‘Eerbare, weerde, voorzieneghe ende wyse, onse harde zeere speciale vrienden, naer alle jonsteghe groetenesse, ulieden ghelieve te wetene dat wy ende ooc de wet van Pamele, metgaders de goede lieden van den rade van deser stede, nu jeghenwoordich up den dach van heden uwe lettren ontfanghen hebben, de welcke wy terstont ghetoocht hebben mynen heere de capyteynen van dezer stede ende die ghesaemder handt⁺ ghesien ende ghevysenteert, ende zullen ooc voort onsen goeden ghemeenen lieden te kennen gheven, dan of 't inhouden van dien wel licht in hu onthoudt, ende by dien verdraghen ons eenich verhael danof te makene, ende insghelycx van der copie van den voorgheboden in uwe lettren besloten. Maer in alzo verren als uwe lettren inhouden als dat ghy vernomen oft verstaen zoudt hebben van der comste van eeneghen volcke van wapenen, ende dat onder 't dexele van onsen gheduchten Heere ende prinche, by den welcken ghy verstaet dat zy ulieden ende ons eenich inder draghen zoude moghen, up dat zo gheschiede, ende oock insghelycx dat wy ontfanghen zouden hebben zekere mandementen, omme van ons voorseyts

+ f^o 105 1^o

[p. 317]

gheduchts Heeren weghen te wederstane ende te wederlegghene de roerynghe ende antierynghe van der coopmanscepe, het zy van grane oft andre; up dwelcke, eersame, voorzieneghe ende wyse, enz., hu ghelieve te wetene dat wy al noch nyet en weten noch versocht en zyn van ons voorschreven gheduchs Heeren wegen of andre omme eenich volck van wapenen hier te commene, ende up dat zo ware, wy hopen altyts te doene alzo goede lieden sculdich zyn van doene, maer zyn de ghene die altyts begheeren te voedene ende verweervene alle ruste, minne ende paeys des lands van Vlaendren, ende daer toe zyn wy bereet by daghe ende by nachte in te aerbeytene, consten oft mochten, ende daer toe en zouden wy ons negheensins willen sparen. Ende als van den mandemente omme te scrivene de coopmanscepe, wy en hebben alnoch danof nyet ontfanghen, alzo wy hu t'anderen tyden ghescreven hebben. Bet voort, up 't voorghebot begrepen in uwe lettren, wy zullen ons poorters ende insetenen zulc ende in dien hebben dat zy 't nyet doen en zullen, en weten ooc nyet dat yement ghedaen heeft, ende zullen 't voorghebot uutlegghen, naer onser costumen, ten naesten maertdaghe.

Eerbare, voorzieneghe, enz., anders en wisten wy u wat meer scriven up den tyt van nu dan dat hu God beware in⁺ ziele ende live. Ghescreven den XXVII^en dach van maerte, enz.

Scepenen ende raedt van der stede van Audenaerde ende ghezwoornen van Pamele⁽¹⁾, al uwe.

+ f^o 105 v^o

(1) De zeven wethouders der baronnij van Pamele binnen de stad Oudenaarde gelegen werden ieder jaar door den beer of baanderheer van Pamele vernieuwd, gelijktijdig met de schepenen der stad welke door de hertogelijke commissarissen benoemd werden. In 1452 was de burgemeester van Oudenaarde Raesse van den Bossche; L. van Lerberghe, Audenaerdsche Mengelingen, D. II, bz. 200.

Superscriptie.

Eerbare, weerde, voorzieneghe, harde lieve ende zeere spetiale vrienden, de hooftmannen, scepenen ende raedt van der stede van Ghendt ende elcken zonderlynghe.’