Dagboek van Gent van 1447 tot 1470. Deel 1

Andwoorde up den zelven drie Leden brief.

‘Eerbaren, voorzieneghen ende wysen, onsen lieven ende gheminden vrienden den ghedeputeerden van den drie Leden 's lands van Vlaendren, jeghenwoordelic wesende te Brucele, scepenen ende raedt van der stede van Ghendt, saluut ende alle vrientscepe. Eersame, gheminde vrienden, up 't inhebben van uwen lettren ons lest ghesonden, mentioen makende dat zaterdaghe spade onse gheduchte Heere ende prince in zynen raedt dede verhalen vele van den voorleden zaken gheschiet by die van zynder stede van Ghendt, daer inne hem dynct zyne heere ende heerlichede ghequetst, welcke zaken wy ghenouch weten moghen by den rapoorte ons daer af ghedaen by den ghenen die daer af voortyts last ghehadt hebben; ende al zyt ghy daer commen ende dat daer naer ghescreven es an mynen heere den grave van Saint-Pol, van den goeden lieden van deser stede weghe, die schynen begheerende gratie ende paeys van mynen voorschreven gheduchten Heere, nochtans hebben sint vele nyeuwicheden ghedaen ende daghelicx doen in statuten te makene, gheboden ende verboden te doene in⁺ bejeghentheden zyner voorschrevene heerlichede al toecommen, by der auctoriteyt van den drien Hooftmannen, alzo hy gheinformeert es, ende daer omme en wille hy te gheenen tractate verstaen, alzo langhe als dese zyne stede by hemlieden

+ f^o 87 r^o

[p. 277]

gheregiert zal wesen; maer waer 't zo dat zulc regement hier nyet en waere ende zyne goeden van hier of ghy over hemlieden, yet redelicx begheerdet, hy zoude zo vele doen dat onse heere God alvoren ende zyne goeden lieden, nyet alleene van deser zynder stede, maer oock van zynen lande van Vlaendren, wel ghepaeyt van hem wesen zauden; ons dit beteeckenende ten hende dat wy daer up advys hebben moghen ende de Hooftmannen zo contenteren in zulcken redelicken middelen ende manieren, dat zy ontlast werden van hueren regemente zo eer zo beter, want dat ghedaen zynde, daer zal alle duecht afcommen; dat ghy oock, omme beters wille, daer zult blyven verbeydende mynen heere van Saint-Pol, 't beste doende alzo ghy bevinden zult van noode zynde, ende up hope van goeder andwoorden hier uppe van ons t'hebbene. Hulieden zy ghelievelic te wetene dat wy u bedancken, alzo vriendelic ende begheerlic als wy connen, dat hu ghelieft heeft 't beste in onse zake te doene, ons presenterende in ghelycken ende andre zaken die hulieden danckelic zouden moghen wesen t'uwaerts ghewillich. Ende wy, die zeere bedrouft zyn dat ghy nyet en hebt connen voor ons gheprouffiteren als 't recht es, hoe wel dat wy wel weten dat ghy hu beste ghetrauwelic ghedaen hebt, ende connen u jeghenwoordelic gheene behoorlicke andwoorde hier toe dienende ghescriven, anghesien dat ons onmueghelic es de drie Hooftmannen te ontlastene van hueren regemente; maer staet die ontlastynghe in 't ghemeen volck, alzo ghy beseffen muecht, welc volc zeer ontpaeyt es dat men ulieden een maent heeft hauden ligghende volghende, zonder 't saufconduut te ghecryghene, ende mids dien begheert hendelic dat ghy nyet meer ghevolchs en doet; niet min, omme dieswille dat mynen heere de grave van Saint-Pol daer es, zo bidden wy hu vriendelic dat ghy metsgaders hem noch 't beste⁺ daer inne doen wilt eenen dach oft twee, ende en cuendy binnen dien tyden nyet gheprouffyteren, dat ghy t'uuswaert trect, ten zy dat ghy u selfs zake daer te doene ende volghene hebt. Ende binnen den zelven tyde, wy die bescaede lieden zyn ende ne

+ f^o 87 v^o

[p. 278]

zullen 't in dusdaneghen state nyet connen ghehauden, zullen binnen middelen tyden ghetrauwelic pynen 't beste te doene naer onsen vermoghene, alzo wy tot nu ghedaen hebben. Ende als wy 't nyet langher ghehauden en connen, zo bidden wy Gode duer zyn ghenade dat hy ons in hulpen wesen wille, die hu, eerbare, voorzieneghe ende wyse, lieve gheminde vrienden, bewaren wille. Ghescreven den eersten dach van sporcle.

Eerbaren, voorzieneghen ende wyzen, lieven ende gheminden vrienden, den ghedeputeerden van den drie Leden 's lands van Vlaendren, jeghenwoordelic wesende te Brucele ende elcken zonderlynghe.’