Dagboek van Gent van 1447 tot 1470. Deel 1

Den brief ghesonden by den drie Leden 's lands an dese stede van der andworde ghegheven by mynen gheduchten Heere, up 't versouck van den saufconduute, ghedaen te Brucele.

⁺ ‘Eerbare, wyse, lieve ende zeer gheminde vrienden, wy ghebieden ons jonstelic t'uwaerts, ende hu ghelieve te wetene

+ f^o 86 r^o

[p. 275]

dat nu t'avondt spade onse gheduchte Heere ende prinche in zynen raedt heeft ghedaen verhalen vele van den voorledenen zaken gheschiet by die van zynder stede van Ghendt, daer inne dat hem dynct dat zyne eere ende heerlichede ghequetst zyn, de welcke zaken ghy ghenouch weten muecht by den rapoorte daeraf ghedaen by den ghenen die voortyts daer af last ghehadt hebben. Ende al eyst 't zo dat wy hier vooren commen zyn ende dat naer ghescreven es an mynen gheduchten heere den grave van Saint Pol, van den voorschrevene van Ghendt weghen, die schynen begheerende de gracie ende paeys van onsen voorschreven gheduchten Heere, nochtans zy hebben sindert vele nyeuwichede ghedaen ende daghelicx doen in statuten ende ordinantien te makene, gheboden ende verboden in bejeghentheden van zynder heerlicheden ende van goede weghe van paeyse al toecommen, by der auctoriteyt van den drie Hooftmannen, alzo hy gheinformeert es, ende daer omme en wille te gheenen tractate verstaen, alzo langhe als zyne voorschrevene stede by hemlieden gheregiert zal wesen, maer waer 't zo dat zulc regement daer nyet en waere ende zyne goede lieden van Ghendt oft wy over hemlieden yet redelicx begheerden, hy zoude zo vele doen dat onse heere alvooren ende zyne goede lieden, nyet alleene van Ghendt, maer oock van zynen lande van Vlaendren ghemeenlic, wel ghepaeyt van hem zullen wesen; welcke zaken wy hu, eerbare ende wyse, lieve ende zeere gheminde vrienden, ghetrauwelic beteeckenen, ten hende dat ghy daer uppe advys ende voorzienichede hebben muecht ende de voorschrevene Hooftmannen zo contenteren, by zulcken redelicken middelen ende manieren, dat zy ontlast werden van hueren regemente zo eer zo betere, wandt dat ghedaen zynde, daer zal alle duecht afcommen. Ende nyet min,⁺ omme beters wille, wy zullen hier noch bliven verbeydende de comste van mynen voorschrevenen heere van Saint-Pol, 't beste doende daer ende alzo wy bevinden dat van node es, ende up hope van goeder andwoorden hier uppe van hu te hebbene, omme de welcke wy hu vriendelic bidden. Ende

+ f^o 86 v^o

[p. 276]

ghelieft hu yet dat wy vermoghen, dat willen wy gheerne doen. Dat weet God, die hu, eerbare, enz., bewaren ende sparen wille in goeden levene. Ghescreven haestelic te Bruecele, desen zaterdach 's nachs XXIX^en january.’

Eerbaren, voorzieneghen ende wyzen, onsen lieven ende zeer gheminden vrienden, scepenen, raedt ende beede de dekenen van der stede van Ghendt ende elcken zonderlynghe.

De ghedeputeerde van der steden van Brugghe, Ypre ende 's lands van den Vryen, nu wesende te Brucele.