Dagboek van Gent van 1447 tot 1470. Deel 1

[p. 270]

De lettre ghesonden van der stede weghe an den Grave van Saint-Pol, achtervolghende den voornoemde scrivene van den drie Leden voorseyt.

‘Hooghe ende moghende prinche, harde lieve ende welgheminde heere, wy ghebieden ons alzo onderdanichlic ende oodmoedelic als wy connen an uwen princhelicken persoon, den zelven bedanckende harde jonstelic van dat hu ghelieft heeft onse brieven onlancx an hu ghescreven, ende de persoonen daer met ghesonden, vriendelic ende minnelic te ontfane, alzo ons wel bleken es by der relatie van den zelven persoonen; in 't ghelycke van dat hu ghelieft heeft by ons te zendene met huwen gheloove den zelven onsen scrivene anclevende, Ghylame Uuten Zwane⁽¹⁾, uwen baeliu van Edynghen, ende van den vriendelicken ende bystandeghen woorden die hy van uwent⁺ weghen daer up ons te kennen ghegheven heeft; ende voort, dat hu ghelieft heeft bovendien, omme derzelver zaken wille, te zendene een van uwen rudders⁽²⁾ by mynen harden gheduchten Heere ende prinche, dien God bewaren wille, de welcke zo wy verstaen hebben by den scryvene van den drie Leden 's landts van Vlaendren, den brief dien wy hu zonden daer ghetoocht heeft, ende zo vele daer toe gheschiedt, dat myn voorschreven gheduchte Heere dien ghevysenteert hebbende, wel content es dat ghy hu de zake van deser stede bewint, daer wy grootelic inne verblyt zyn, als 't recht es. Midts welcken, hooghe ende moghende prinche harde lieve ende welgheminde heere, wy hu bidden alzo oodmoedelic ende vriendelic als wy connen, dat, omme de welvaert van deser voorschrevene stede, u wille ghelieven continuerene uwe goede meenynghe die ghy te dierewaerts hebt, te treckene by mynen voornoemden gheduchten

(1) Lees vooreerst den brief van Louis de St-Pol aan het Gentsch bestuur op 19 Januari geschreven, op f^o 119 v^o; 's anderdaags kwam Gillis Uterzwane te Gent aan (Stadsrekeningen over 1451-52, f^o 203 v^o).

+ f^o 84 r^o

(2) Jacques de Lumi, volgens den voorgaanden brief.

[p. 271]

Heere, zo ghy eerst zult connen ende moghen, ende daer al 't beste daer inne doen, alzo wy uwer princelicker gratien ende duecht vulcommelic betrauwende zyn, ende ons voort te bevelene uwe princelicke gheliefte te vulcommene, van den welcken wy ons altyts naer onsen cleenen vermoghen presenteren ghewillichlic bereet met goeder herten, want wy ons daer toe grootelic ghehauden kennen, als 't recht es. Dat kent God die uwen princelicken persoon altyts bewaren wille in zyne heleghe bescheermenesse ende ghesonden. Ghescreven den XXVII^e dach in Laumaent anno LI.’

Hooghen, edelen ende moghenden prinche, den grave van St-Pol, van Lyne, van Conversant ende van Brienne, heere van Edynghen ende castelleyn van Ryssele, onsen harden, weerden ende welgheminden heere.

t'Uwer belieften altyts bereet, Hooftmannen, Scepenen, Raed ende beede de Dekenen van der stede van Ghendt, uwe onderdaneghe dienaers.