Dagboek van Gent van 1447 tot 1470. Deel 1

De andwoorde die de drie Leden, wesende te Brucele, zonden te Ghendt up de bede hemlieden ghedaen ten vercryghene van 't saufconduut.

‘Eerbare ende wyse, lieve ende zeer gheminde vrienden, wy ghebieden ons jonstelic t'uwaerts, ende hu ghelieve te wetene dat sichtent onsen laetsten scrivene, by den welcken wy hu

[p. 269]

beteeckenden en overghaven dat wy heden oft morghen andwoorde zouden ghehadt hebben, alzo wy ghetroost waren, enz., myn heere de bisscop van Doornycke heeft ons gheseyt dat myn heere de grave van Saint-Pol hier ghesendt heeft eenen ruddere, gheheeten messire Jacques De Lumi, ghelast an onsen gheduchten Heere te zegghene dat ghy ghescreven hebt an mynen voorschreven heere van Saint-Pol, hem biddende dat hy u helpen wille omme te commene te paeyse van onsen gheduchten Heere, ende te wetene oft den zelven onsen gheduchten Heere danckelic wesen zaude dat hy hem in dese zake moeyde. Ende es uwen brief van dien ghevysiteert voor onsen gheduchten Heere in zynen rade, daer uppe hy den voorseyden messire Jacques ghelast heeft te zegghene dat hy wel content es dat hem⁺ myn voorschreven heere van Saint-Pol in dese zake moeye ende alzo zal hy 't overdraghen te zulcker meenynghen dat myn heere van Saint-Pol, die nu te Rysele es, alzo wy verstaen, terstondt herwaerts comme⁽¹⁾; ende daer omme es ons ghelast zyne comste hier te verbeydene, alzo wy doen zullen om beters wille, al eys 't verdrietelic, hu biddende, eerbare, wyse, lieve ende zeere gheminde vrienden, dat ghy patiencie hebben wilt in dit verbeyden, ende, achtervolghende uwen goeden beghinsele, dat ghy nog anderwaerf scriven wilt an mynen voorschrevenen heere van Saint-Pol, dat hy hier commen wille ende zyne goede duecht bewysen in deze zake, zo eer zo liever. Ende ghelieft hu yet anders dat wy vermoghen, dat willen wy gheerne doen, dat kendt God die hu zalichlic bewaren wille. Ghescreven haestelic te Brucele, desen Sente-Pauwels dach, XXV^e in laumaent.’

Eerbaren, wysen, onsen lieven ende zeer beminden vrienden, den drie Hooftmannen, scepenen van beede den bancken ende beede den dekenen der stede van Ghendt ende elcken zonderlynghe.

De ghedeputeerde van der steden Brugghe, Ypre ende 's lands van den Vryen, nu wesende te Brucele.

+ f^o 83 v^o

(1) Op 9 Januari trok hij over Oudenaarde naar Brugge. Zie L. van Lerberghe, Audenaerdsche Mengelingen, D. V, bz. 284.