Dagboek van Gent van 1447 tot 1470. Deel 1

De lettren ghesonden an de stede van Dendermonde in surcourse ende ontlastynghen van den landtvolcke van Dendermonde.

‘Hooftmannen, scepenen ende raedt van der stede van Ghendt.

Eersame, wyse, lieve ende gheminde vrienden, up den dach van heden, zyn voor ons commen in redelicken ghetale, zekere persoonen van den lande van Dendermonde, ons te kennen ghevende hoe dat onlancx de onderbaelieu ende overmeyere van den zelven lande, hemlieden bevolen hebben te bereedene twee hondert sergianten, d'een hondert te sendene binnen der stede van Dendermonde, in woonsdaghe eerstcommende, ende d'ander hondert bereet te zyne jeghens dat van doene werde; voort dat zy ghelden zauden haerlieder andeel van alle den

[p. 267]

costen binnen Dendermonde ghedaen ende dier m'er noch doen zal, anclevende de jeghenwoordeghe onleden, ofte daer zy dies in ghebreke waren, men zaude de ghebreckelichede halen van⁺ den bedde of ghenomen in substantien, dat eenen intert es van riguere ende ons vremde gheeft, anghesien dat wy ende de goede lieden van deser stede die ghelaten zyn, by den weerne van den baellius ende andre officiers met allen buten justicien, anders nyet en begheeren dan in paeyse ende justicien te levene, ende hebben ghebeden de drie Leden des lands van Vlaendren te treckene by onsen gheduchten Heere ende prinche, dien God bewaren wille, die nu by hem zyn omme wat goets te impetreerne, waer af wy nyet vernomen hebben dan dat dezelve ons gheduchte Heere begheert de welvaert van deser zynder zelver stede, Gode lof. Ende wy, omme hier toe bet te commene, hebben onlancx ghescreven moghenden prince ende heere, myn heere de grave van Saint-Pol⁽¹⁾, die gheconsenteert heeft hem te bewindene van den zaken van deser voorschrevene stede, by den welcken ons dynct dat gheen nood es zulc intert van riguere te beghinnene, als ghy in dese zake begonnen hebt, want wy an onsen gheduchten Heere ende prinche, die nyet dan duecht en meent, hopen dat by der gracien Gods, de zaken van deser stede noch commen zullen ten effecte; ende mids dien zo versoucken wy begheerlic aen hulieden ende elcken zonderlynghe dat ghy, om wel doens wille, van zulcken rygoureusen

+ f^o 82 v^o

(1) Louis de Luxembourg, graaf van Saint Pol, van Ligny, Conversan en Brienne, geboren in 1418, werd door Philips den Goede gelast in 1446 het leger te bevelen, ter hulp gezonden van den hertog van Kleef tegen Willem van Saksen, nam met Karel VII van Frankrijk deel aan de verovering van Normandië in 1449 en werd door hem als afgezant bij Philips den Goede gezonden; men weet hoe hij later door Karel den Stoute aan Lodewijk XI werd overgeleverd welke hem op 19 December 1475 te Parijs deed onthoofden.
Over de tusschenkomst als bemiddelaar van den graaf de Saint Pol, zie Stadsrekeningen 1451-52, f^o 160 r^o: ‘Item ghegheven den VII^sten dach van Laumaent eenen messager van den grave van St-Pol eenen postulaetsgnldenen’. Op 19^en Januari schreef hij aan de stad Gent den brief in 't Dagboek afgeschreven op f^o 120 r^o.

[p. 268]

interden meer te doene, hulieder verdraghen wilt ende te nyenten doen 't bevel, dat ghy aldus onbehoorlic ghedaen hebt den voornoemden lantslieden van Dendermonde ende ulieden daer inne zo voughen dat ghy gheene beghinners en weest van onleden, wandt daer ghy 't anders daet, wy zouden 't in hulden van onsen gheduchten heere ende ter welvaert van deser zynen lande pynen te wederstane ende de schamele lantslieden van zulcken overlasten te bescuddene naer ons vermueghen, alzo wy sculdich zyn te doene, ende hebben emmer toe in teeckene van dien, bevolen den voornoemden lantslieden dat zy te zulcken uwen beveelne nyet en obedieren, ende dat ghy hemlieden, omme diere desobedientie, overlast wildet doen, dat zy elc⁺ andren bystandicheden doen ende by clocslaghen ende beckinslaghen terstondt becondeghen zullen haeren overlast, ende wy zullen hemlieden daer inne bystaen, ende omme de meeste verzekertheden, hebben hemlieden van deser gheconsenteert onse opene lettren. Dus, eersame ende wyse, lieve ende gheminde vrienden, versoucken wy an hulieden dat ghy overmeerckende al 't ghuendt dat vooren verhaelt es, 't beste hier inne doen wilt, zo wy ulieden betrauwen; ende ghelieven ulieden eeneghe zaken, beteeckent se ons, wy zullen se naer onse vermueghene gheerne vulcommen, altyts in hulden van onsen gheduchten Heere ende dese zynder stede. Dat kent God die hu bewaren wille. Ghescreven den XX^en dach van laumaent anno LI.

Eersame, lieve vrienden, capytaynen, scepenen ende raedt van der stede van Denremonde ende elcken sonderlynghe.’

+ f^o 83 r^o