Dagboek van Gent van 1447 tot 1470. Deel 1

Wie naerhede⁽¹⁾ hebben mach an de fugytiven goedt.

‘Voort gheeft men hu allen te kennene ende elc byzondre, dat elc wiens maech oft vrient die fugytyf ghemaect es, in zulcker wys dat zyn goet als nu by den Hooftmannen ten prouffyte van⁺ der stede in sequestren⁽²⁾ gheleyt es, commen zal moghen, wanneer dat men 't zelve goet prysen zal ende behauden voor den prys daer 't vooren ghepresen werdt, mids overlegghende den ontfangbere van der stede al zulcke sommen van pennynghen als 't ghepresen werden zal, in de huusen oft ander goet die al zulcke persoonen toebehooren; dat insghelycx die zullen moghen lossen haerlieder vrienden, ofte de ghuene die waerzegghen zullen moghen den ontfanghere van der stede dien zy al nu toebehoren, de zelve sommen te betalene, t'al zulcken daghen ende payementen als men ordineren zal; ende eyst by alzo dat nyement van den fugytiven weghen de zelve catteylen oft huusen lossen wille, zo zal men de catteylen oft de huusen, in den name van der stede, vercoopen den ghenen die 't aengaet ende van der stede weghen daer af warant⁽³⁾ beloven den coopere, alzo daer toe dienen ende behooren zal.’

(1) Naerhede, voorkeur van koop, uit hoofde van bloedverwantschap.

+ f^o 70 v^o

(2) Sous séquestre, in beslag.

(3) Warant, het Fr. garant, garantie, verzekering.