Dagboek van Gent van 1447 tot 1470. Deel 1

[p. 233]

Voorghebot van vremde ghezellen.

‘Omme dieswille dat daghelicx useren, costumeren binnen deser stede te converseerne ende te wandelne vele vremde personen ende ghezellen, eeneghe gaende up de aelmoesene van den goeden lieden ende andre anderssins, in diversche manieren, daer af dat men lettel oft nyet weet wies zy vooren hebben of in meenynghen zyn van doene, want by zulcke vremde ghezellen, die men nyet en kent oft en weet van wat state oft conditien zy zyn, de stede, up datter⁽¹⁾ nyet inne voorsien en worde, ghescepen ware te commene in onghevalle ende⁺ verdriete, dies God behoede, up datter nyet inne voorzien en worde, het ware by brande oft by vremde twistynghen, die zulcke persoonen binnen der steden brynghen mochten ofte daer uute draghen, in achterdeele van der stede.

So es by den Hooftmannen ende haerlieder raetslieden overeenghedreghen ende ghesloten, ende men ghebiet van den drie Hooftmannen weghen, dat hemlieden van nu voortan alle vremde ghezellen, van wat state of conditien zy zyn, in nyements dienst wesende, hemlieden verdraghende binnen der stede te commene oft daer inne te blyvene langher dan eenen nacht ende eenen dach, oft het ne ware by octroye ende consente van den drie Hooftmannen, dien zy de zake van huerlieder blyvene ghehauden zauden werden te kennen te ghevene, ende zo wie de contrarie van deser dade ende langher bleve dan voorschreven es, die zoude men terstont upleeden ende vanghen, ten fyne dat de Hooftmannen daer af onderzouck doen zauden omme te wetene wat zulcke persoonen vooren hadden oft in wille waren te doene, ende elcken daer af corrigieren ende punieren naer de grootte van der mesdaet.

Ende om dieswille dat de zelve zake aengaet elcken poortere ende inwonenden van deser stede, zo maken de drie Hooftmannen, elcken wie hy zy, hier af vanghere, ende dat elck

(1) Up datter, indien er.

+ f^o 69 r^o

[p. 234]

zulcke persoonen ghehauden zal werden te vanghene ende daer naer te brynghene voor de Hooftmannen ofte in Chaucelet, zonder dies te wesene in eeneghen ghebreke, up de correctie van der zelver Hooftmannen.

Item, dat nyement eeneghe vremde persoonen, ghelyck voorschreven es, en logiere noch en heerberghe langher dan eenen dach ende eenen nacht; die 't dade ende bevonden worde, die zullen die Hooftmannen corrigieren up haerlieder eed, als dat andere daer an exemple nemen zullen.’