Dagboek van Gent van 1447 tot 1470. Deel 1

[p. 204]

VI. D'ander remissie⁽¹⁾.

‘Philips, bi der gracien Gods, hertoghe van Bourgoengen, van Lother, van Brabant ende van Limborch, grave van Vlaendren, van Artois, van Bourgoengen palatin ende van Henegauwen, van Hollant, van Zeelant ende van Namen, maercgrave des Helichs Rycs, heere van Vrieslant, van Salins ende van Mechline, doen condt ende allen den ghenen die nu zyn ende naermaels wesen zullen. Bi der ghedeputeerden van scepenen, raden ende allen der ghemeente van onser stede van Ghend jeghenwoordelic bi ons ghecommen, in alder oetmoedicheit ons te kennen ghegheven wesende hoe dat onlanx leden de voorseyde ghemeente zeere beroert, ghemaect heeft zekere wapeninghe ende groote ongheorlofde vergaderinghe, daer in Ghizelbrecht Pateete⁽²⁾, overdeken van den lede van der neerynghen onser voorseyde stede van Ghend, vernielt ende versleghen gheweest heeft, ende andere ghewont ende ghequetst; ende daer naer heeft haer de zelve ghemeente met haer bannieren zekeren tyt ghehouden in de wapene up de maerct, daer af zy bekennende dat zy dat niet sculdich en hadden gheweest te doene, alzo druckich ende rauwich van herten gheweest hebben ende zyn als zy emmermeer moghen, niet min zy ne hebben anders niet mesdaen, maer zyn zindert ghescheeden ende uter wapene ghegaen ende elc vredelic ghetrocken t'zinen huus, also de voorseyde ghedeputeerden ons anbrocht hebben, biddende in alre oetmoedicheit ende onderdanicheit, ghemerct dat zy altyts willen wesen ende blyven onse goede ende ghetrouwe ondersaten, dat de voorschrevene faiten niet bi vorraden, nemaer in

(1) Het oorspronkelijke stuk, volgens hetwelke wij het Dagboek verbeterden, bevindt zich, zeer erg geschonden en bijna onleesbaar geworden op het Gentsch Stadsarchief, N^r 572 van het Inventaire van Van Duyse.

(2) Memorieboek, D. I, bz. 203; Monstrelet, Chroniques, (uitg. voor de Société de l'Histoire de France, door L. Douet d'Arcq), D. V, bz. 280.

[p. 205]

hitten van bloede gheschiet zyn bi ghemeenten ende onbekenden⁺ lieden van cleenen state, ende dat in de voorseyde vergaderinghen onsen lieden ende officiers niet mesdaen noch te cort gheboden heeft gheweest, noch anderssins yet hier inne gheschiet es in versmadenessen van ons, noch van onser heerlicheyt, alzo zy zegghen, dat wy hemlieden de vergaderinghen in wapenen, dootslach, faiten, beroerten ende mesgripen voorseyd ende al dat daer ute ghevollecht es, bi onser gracie ende goedertierheden vergheven willen ende onse ooghen van ontfaermicheden up hemlieden keeren. Waeromme wy, ter eere ende weerdicheit van Gode alvoren, ter jongst ende neerenste bede ende versoucke van onser liever ende gheminder ghezelneden der hertoghinne ende van onsen lieven neve, den Joncker van Cleven, ter oetmoedigher bede oec van eerweerdighen vader in Gode den bisscop van Doornicke, den heere van Croy, onsen neve den heere van Charny, Mer Roelande Van Uutkerke ende den heere van Steenhuse, ende andren van onsen rade jeghewordelic bi ons wesende, hebben den zelven van onser stede van Ghend, ende allen den ghenen ghemeenlic die 't angaen mach, groot ende cleene, van wat state of condicien dat zy zyn, ende elken van hemlieden zonderlinghe, ten hende dat zy te meer ghehouden werden ons te dienene als wy 's an hemlieden versouken zullen, quytghescolden ende vergheven, ende voor ons onsen hoyren ende naercommeren, graven ende graefneden van Vlaendren, schelden quyt ende vergheven bi onser specialer gracie ende mogenthede, met desen brieven, al 't ghuent dat zy jeghens ons ende justicie mesdaen moghen hebben in de vergaderinghen, in wapeninghen, dootslach, faiten, beroerten oft overdaden ende mesgripen boven verclaert ende in al dat daer ute ghespruut ende ghevollecht es, ende stellen se gheheellic weder in zulcken state als zy waren eer de voorschrevene mesgripen gheschieden, zonder dat nu of in toecommenden tiden den voorseyden van Ghend noch eenighen van hemlieden daer omme eeneghe ansprake ghedaen moghe werden by ons noch onsen voorseyden hoire, noch naer-⁺

+ f^o 57 r^o

+ f^o 57 v^o

[p. 206]

commers, in live oft anders in eenegher wys. Ontbieden daer omme ende bevelen onsen lieven ende ghetrouwen raedslieden, residentie haudende in onse camere van den rade te Ghend, onsen souverain bailliu van Vlaendren, onsen bailliu van Ghend, ende allen onsen andren baillius ende officiers, also wel van onsen voorseyden lande van Vlaendren als van allen onsen anderen landen ende heerlicheden die nu zyn of namaels wesen zullen, huerer stedehoudren ende elken van hemlieden bizondre ende evenverre dat hem angaen mach, dat zy deser onser gracie, ghenaden ende quytscheldinghe laten doen ende ghedooghen der vornoemde onser stede van Ghend ende elken van hemlieden zonderlinghe, rustelic ende vredelic ghebruken t'eeuwighen daghen, zonder hemlieden ofte eenigher huerer te doen ofte laten gheschiene, nu of in toecommenden tyden, eenigher hinder of belet in live noch andersins ter contrarien in eenegher wys, want wy alzo ghedaen willen hebben. Ende ten hende dat dit vast ende gestadich ghehouden zy t'eeuwighen daghen, wy hebben onsen heimeliken zeghele, in de absentie van den groten, hier an doen hanghen. Ghegeven in onser stadt van Bruessele, den XXIII^en dach van april naer Paesschen, in 't jaer ons Heeren duusentich IIII^c XXXVII.’

(Aldus gheteekent):

Bi minen heere den Hertoghe,

Wielant.