Dagboek van Gent van 1447 tot 1470. Deel 1

VII. De derde remissie⁽¹⁾.

‘Philips, by der gratien Gods, hertoghe van Bourgoyngnien ende van Brabant, enz., doen te wetene allen den ghenen nu zynde ende toecommende, als dat scepenen van beede de bancken ende beede de dekenen van onser stede van Ghendt,

(1) Dit stuk bevindt zich in Franschen tekst op het Stadsarchief te Gent, N^r 582, ontleed bij Van Duyse, Inventaire des archives, bz. 206.

[p. 207]

verselsceept metten lieden van den Drie Staten der zelver onser stede in grooten ghetale, in sondaghe lestleden, den X^en dach van dese maent, voor ons commen zyn binnen onser voorschrevene stede⁽¹⁾, in aller oodmoedicheden ende onderdanicheden⁺ hebben doen zegghen ende vertooghen hoe dat van der wapenynghen, loopynghe, vergaderynghe ende beroerten ghedaen in onse stede van Ghendt ende daer buuten by onsen subgyten ende insetenen der zelver, zyndert dat wy commen zyn t'onsen heerlicheden van onsen voorschrevenen lande van Vlaendren, ende emmer, wy lest wesende in onse voorschrevene stede van Ghendt ende ooc zyndert onsen vertreckene der zelver ende van 't ghuendt datter naer ghevolght es, daer inne dat de doenders, de consenteres ende de besculdegde harde grootelic mesdaen ende mesgrepen hebben t'onswaert ende anghenomen boven ende jeghens onse hoochede ende heerlichede, doende criesme de lese maiestate ende andere diversche groote criesme ende mesdaden, de voorschrevene van onser stede van Ghendt hebben gheweest ende zyn alzo bedruct ende drouve van herten ende hebben harde grievelic ende buten onghenouchten als zy ter weerelt hebben mochten. Ende naer dat zy, vergheselsceept ghelyc 't voorseyt es, ons hadden met hoogher voix gheroupen ghenade, ons hebben ghesuppliert in aller oodmoedegher oodmoedicheden, aenghesien huerlieder berauwen ende emmer dat zy boven alle dynghen begheeren te zyne ende hemlieden te haudene in onse gracie ende te levene in goeden paeyse, eendrachticheden ende accoorde onder ons ende t'onswaert te doene al dat goede ghetrauwe subgyten sculdich zyn te doene t'haren gherechten heere ende prince waert, dat ons ghelieve by onser gratien alle de voorschrevene dynghen ghepasseert ende toecommen in onse voorschrevene stede ende der buten te weerne van onser herten, ende omme de eere ende weerdichede van onsen ghebenedyden sceppere God almachtich, goedertier-

(1) De hertog was inderdaad in Gent op 10 Juli 1440, zie de Stadsrekeningen over 1439-40, f^o 274 r^o.

+ f^o 58 r^o

[p. 208]

lich hemlieden wederstellen quyte ende vergheven ende onse voorschrevene stede van Ghendt, metsgaders alle onse goede ende ghetrauwe ondersaten in de zelve, nemen, hebben ende hauden in goede gratie ende minne, zegghende ende vervaende dat ghelycke nyet meer gheschien noch toecommen zal in onse voorschrevene stede. Waer om wy, als prince, ghenadich ende ontfaermicheden beroert met compassien ende deernessen⁺ t'onser voorschrevene stede waert van Ghendt ende t'onsen goeden onderzaten ende inwonende der zelver steden, ende begheerende derzelver onser stede ende onderzaten te levene ende te blyvene in paeyse ende broederscepe ende in onse goede gratie, de dynghen vooren gheseyt ende gheconsidereert, evenverre de groote ootmoedichede ende onderdanichede daer inne dat zy t'onserwaert ghestelt zyn; wy, alzo wy sculdich zyn te doene de voorschrevene onse stede van Ghendt, willende in de zaken sturten onse gratie ende ghenadicheden van voorgaende riguer van justicien, onser voorschrevene stede van Ghendt ende alle onsen goeden ende ghetrauwen subgyten ende insetenen der zelver ghegheven jonstelic t'harer supplicatien, hebben, omme dese zaken ende emmere omme de eere ende weerdichede, ghequyt ende vergheven, by den inhaudene van desen presenten van paeyse ende ghenadicheden, al 't ghuendt daer inne de zelve onse stede ende onsen subgyten insetenen der zelver, alzo wel in 't generale als in 't speciale, hemlieden mesgrepen ende moghen mesdaen ende mesgrepen hebben t'onswaert ende ter justicien, ter causen ende by den middelen van den voorschreven wapenynghen, loopynghen, vergaderynghen, beroerten ende 't ghuendt datter naer ghevolght es, in wat manieren het zy, metgaders ooc al den peynen ende lichamelicker beterynghe, cryminele ende civyle, die omme de zaken ende occasien van den voorschreven dynghen ende huer circonstantien ende toebehoorten zy oft eenich van hemlieden moghen hebben verbuert ende ghevallen zyn t'onswaert, ende justicien, lastende hier af eeuwich te zwyghene onsen procureurs, ten andren onsen officiers,

+ f^o 58 v^o

[p. 209]

hoedanich zy zyn, in vermeersynghen van onsen voorschreven gratien, weerende ende stellende uut onsen herten ende in 't vergheten alle de voorschrevene dynghen leden ende ooc alle rancuer ende ondanc die ten occoysoene van den zelven wy mochten hebben de zelve onse stede van Ghendt ende alle onse subgyten daer wonende, wy hebben ghenomen ende ghestelt, nemen ende stellen by dese voorschrevene punten in onse gratie ende goedertierheden. Emmer onse meenynghe en es nyet dat in onse jeghenwoordeghe gratie, quytanchie, remissie ende⁺ verghevenesse eeneghe begrepen zyn die ghuene die ghebannen hebben gheweest of werden zullen van nu voortan by den lieden van onser voorschrevene stede van Ghendt van matterien of beroerten, oft ghedaen hebbende ende ghecommitteert eeneghe dynghen jeghen ons oft onser hoocheden, heerlicheden ende edelheden oft jeghens den welvaert van den paeyse ende eendrachtichede van onsen voorschrevenen lande van Vlaendren ende van onser stede van Ghendt, zo gheven wy in bevelen onsen gheminden ende ghetrauwen lieden van onser camere van den rade in Vlaendren, onsen souverayn baelliu, onsen baellius van Ghendt ende van der Ouderburch ende allen onsen andren baellius, justiciers ende officiers van onsen voorschrevenen lande ende graefscepe van Vlaendren, hueren stedehoudren ende elcken zonderlynghen, in alzo verren als 't hem aengaet, dat van onser gratien, instancien, remissien ende verghevenesse zy ende elc van hemlieden doen, ghedooghen ende laten onser voorschrevene stede van Ghendt ende onse voorschrevenen goeden lieden ende insetene derzelver ende elcken van hemlieden, vulcommelic ende paeysivelic ghebruucken ende useren, alzo ende in der voormen ende manieren dat gheschiet es, zonder ter contrarien hemlieden te doene stellene of ghevene, noch ghedooghen te doene stellene oft ghevene, nu noch in toecommenden tyden, in lyfve noch in goede, eenich arrest, molestacie oft empessement in eenegher manieren; want alzo ghelievet ons ghedaen te zyne. Ende ten fyne datte dit zyn dynghen vaste ende gheduerich

+ f^o 59 r^o

[p. 210]

t'eeuwelicken daghen, wy hebben an dese presente doen stellen onzen zeghele, behauden in andren zaken onsen rechten ende elcx anders in al. Ghegheven in de stede van Ghendt, den XVI^en van wedemaent⁽¹⁾, in 't jaer van gracien duust IIII^c ende XL.’

Aldus ondergeschreven: By mynen heeren den hertoghe, den bisscop van Doornycke, den heere van Ruestschuere, souverayn baelliu van Vlaendren, meester Gillis Van der Woestynen.

Gheteekent: J. Bul.

(1) Lees Juli, als terecht het Fransche oorspronkelijk stuk opgeeft.