Dagboek van Gent van 1447 tot 1470. Deel 1

D'eerste remissie⁽¹⁾.⁺

‘Philips, bi der gracien Gods, hertoghe van Borgoengen, van Lother, van Brabant ende van Lymborch, grave van Vlaendren, van Artois, van Borgoengen palatin ende van Namen, maercgrave des Helichs Rycs, heere van Salins ende van Mechelen, doen cond allen den ghenen die nu zyn ende namaels wesen zullen: t'onzer kennesse commen wesende, bi den anbrynghene van den ghedeputeerden van scepenen, rade ende alle der ghemeente onzer stede van Ghend jeghewoordelic by ons ghecommen in grooten ende notablen ghetale, dat onlanx de voorseyde ghemeente in wapenynghen vele ongheoorloofde vergaderinghen ende beroerten⁽²⁾ ghemaect heeft, de vanghenessen van den Chastelette onser voorseyde stede up te broken, der uut ghenomen ende ontcommert onze ghevanghene der in wesende: Jan Boelen, deken van den neerynghen, Daneele van Zeverne, scepene ende Joosse Haesbyt, dekene in dien tyt van den tigheldeckers onser voorschrevene stede, ende eenen van 's voorseyden dekens van den neerynghen-

(1) Die genadebrief hebben wij verbeterd volgens het oorspronkelijk stuk op het Stadsarchief van Gent, N^r 555 van het Inventaire van Van Duyse. - Men zal opmerken dat wij verplicht geweest zijn klaarheidshalve van de volgorde der verschillende akten in het Handschrift merkelijk te veranderen.

+ f^o 55 r^o

(2) Zie over het oproer van 1432 te Gent, Kronijk van Jan van Dixmude (uitg. door de Smet, Corpus Chronicorum Flandriae, D. III), bz. 43; Memorieboek der stad Ghendt, D. I, bz. 193; Olivier van Dixmude, Merkwaerdige Gebeurtenissen, bz. 137; De Onlusten te Gent in 1432-1435, in Bulletijn der maatschappij van Geschied- en Oudheidkunde te Gent (jaargang 1900).

[p. 202]

knapen doot ghesleghen, te meer stonden de clocke onser zelver stede gheclopt ende ghesleghen, ommeganghen ghedaen ende daer in up te broken ende ontwee ghesleghen eenighe huusen ende andersins groote faite ende overdaden ghedaen, daer omme wy ghenomen hebben groote onghenouchte ende gramscepe; niet min zy hebben hemlieden zichtent⁽¹⁾ verdreghen⁽²⁾ meer vergaderinghen in wapenen te doene ende es elc vredelic ghetrocken t'sinen huus, ghelyc zy ons anbrocht hebben, ons zeere omoedelic biddende, ghemerct dat de voorseide faiten gheschiet in hitten van bloede partielic ghedaen hebben ghesyn ende niet jeghen ons noch onser heerlicheit, alzo zy zegghen, dat wy up hemlieden onze ooghen van ontfaermicheden keeren wilden ende van al dat voorseyt es gracie ende ghenade doen ende hemlieden dat vergheven. Waer omme wy, ter eere ende weerdicheit van Gode, ter neerenster begheerte onzer liever ende gheminder ghezelnede der hertoghinnen, ter omoedegher bede ons ghedaen by den eerweerdeghen vader in Gode den bisscop van Doornicke, over hem ende vele andere prelaten ende kerkelicke lieden by ons ghecommen, over den ghemeenen staet der helegher kerke ons lands van Vlaendren, over de⁺ edele ons zelfs lands in grooter menichte by ons wesende ende over onze raedsliede, die jeghewoordelicke in notablen ghetale by ons zyn; ende ooc ter omoedegher bede van den goeden lieden van onzen steden van Brugghe ende Ypre ende van onsen lande van den Vryen, die voor hemlieden ende voor alle de ghene van den Drien Leden ons zelfs lands by ons ghesonden hebben huerlieder ghedeputeerde in eerbaer menichte; ende ten hende dat de voorseyde van Ghend wesen ende bliven onse goede ende ghetrauwe onderzaeten ende ghehauden zyn ons te dienene als wy's an hemlieden begheeren zullen, hebben den zelven van Ghend, ende allen den ghenen ghemeenlicke dien't aengaen mach, groot ende cleene, ende elken zonderlynghe, quytgescholden ende vergheven, ende by onzer certainer

(1) Sichtent, sedert.

(2) Verdreghen, opgehouden.

+ f^o 56 r^o

[p. 203]

sciencie, specialer gracie ende moghenthede schelden quyt ende vergheven gheheelic ende al met goeder herte, over ons, onze hoyre ende naercommers met desen brieve, de vergaderinghe in wapenen, upbrekinghen van vanghenessen, ontcommeringhe van ghevanghenen, dootslaghen ende andere faiten, beroerten ende overdaden boven begrepen ende al 't ghuend datter uutghespruut ende ghevollecht es, zonder dat nu of in toecommenden tiden hier omme eenighe ansprake den voorseyden van Ghend ghedaen moghen werden, nochte dat zy daer omme ghecorrigiert of ghepuniert zullen zyn by ons, noch by onzen hoiren ende naercommeren in live noch andersins in eenigher manieren. Ontbieden daer omme ende bevelen onzen lieven ende ghetrauwen den raedslieden onzer camere van Ghend, onsen souverain bailliu van Vlaenderen, onzen bailliu van Ghend en allen andren onsen lieden, officiers ende dienaren jeghewoordich ende toe te commene, hueren stedehouders ende elken van hemlieden byzondere evenverre dat hem aengaen mach, dat zy deser onser gracie ende quytscheldinghe laten doen ende ghedooghen den voornomde van Ghend ende elken van hemlieden zonderlinghe rustelic ende vredelic ghebruken t'eeuwelicken daghen, sonder hemlieden ofte eenigen huerer te doene ofte laten gheschiene, nu of in toecommenden tiden, eenighen hinder oft belet in live noch andersins ter contrarien in eenigher manieren, want wy 't alzo ghedaen willen hebben.⁺ Ende ten hende dat zy vast ende ghestade t'eeuwighen daghen, wy hebben onsen hemelicken zeghel hier an doen hanghen in absencien van onsen grooten zeghel. Ghegheven in onze stede van Curtricke, den XVIII^en dag van ouste in 't jaer ons Heeren dusentich vierhondert twee ende dertich.’

Bi minen heere den Hertoghe,

Wielant.

[Nog voorzien van den grooten zegel in bruin was, aan een rood en groen zijden koordje hangende].

+ f^o 56 v^o