Dagboek van Gent van 1447 tot 1470. Deel 1

[p. 199]

Vertoochden voor[t] een prevylegie ende quytsceldynghe van tollen, taellien ende zettynghen.

Wy, Lodewyck, grave van Vlaenderen ende van Nevers, doen te wetene alle den ghuenen die dese presente lettren zullen zien oft horen lesen, dat uute dien dat de casselrien ende onderzaeten van onser stede van Ghendt hebben gheweest langhe ghesedt ende ghemolesteert, ghetraveylliert, ghepoint ende vertasseert met meneghen taeyllien, poyntynghen, croweyen, tasserynghen ende exactien onrechtvaerdelicken ende onredelicken alzo zy seyden in grooten grieven, prejuditien ende scaden van der voorseyde casselrien ende ondersaten van den goeden lieden derzelver ende destructien van den voorseyde lande; ende onse meenynghe, wille ende begheerte zyn, dat alle dezelve taellien, poyntynghen, croweyen ende alle andre manieren van tasserynghen ende van den exactien onbehoorlic⁺ werden ghecesseert ende dat de voorseyde casselrien ende onderzaten van allen onsen andren landen van Vlaendren werden ghemaynteneert ende ghegouverneert in behoorlicken state, recht, redene ende ghelyckenesse. Ende dat de edele ende onedele ende alle andere volc die de voorseyde taeyllen, zettynghen, croveyen, tasserynghen ende exactien hebben ghemaect, ghepoynt ende gheordonneert ende ontfaen werden ghepugnyert, ghecastyt ende ghecorrygiert behoorlic naer huer mesdaet ende verdiente, hebben belooft ende beloven dueghdelic in goeder taellien als prince ende goed Heere. Ende willen dat alle de casselryen ende ondersaten van onse voorseyde stede van nu voortan tallen daghen, zyn quyte, ontsleghen ende ontlast van allen ende elcker der zelver lasten, tasserynghen, zettynghen, molestacien, taellien, croweyen ende exactien ende van allen andre taellien ende lasten zonder alleenlic van der taellien ende lasten daer af onse stede van Ghendt zal zyn ghehauden ende gheoblygiert; behauden dese dat, up dat zo bat dat eeneghe steden ende plaetsen van der casselrien ende

+ f^o 55 r^o

[p. 200]

onderzaten boven gheseyt, waeren ghehauden t'ons uut in eeneghe dync meer dan onse voorseyde stede van Ghendt die nyet redelic ende rechtvaerdich dat hierin onse blyven ghehauden. Ontbieden wy ende bevelen scerpelic allen onsen ontfanghers, baellius ende onderbaellius ende allen onsen andren officiers justiciers die zyn en in tyden toecommende zyn zullen, dat zy de voorschrevene casselrien ende onderzaten houden quyte ende paeysivel tallen daghen van den taellien, zettynghen, tasserynghen, croweyen en allen andren exactien ende⁺ lasten inder voormen ende manieren boven gheseyt, en omdat wy willen ende begheeren dat dit zy dinc wel ghehauden, ghewacht ende openbaer elcken hebben wy dese presente lettren ghedaen zeghelen met onsen grooten zeghele in oorcon scepen der waerheden en van vastenessen, dewelcke waren ghedaen ende ghegheven te Ghendt tsmaendaeghs XVIII^e dach van der maent van sporcle in 'tjaer der gheboorten ons Heeren duust III^c XXIIII⁽¹⁾.

+ f^o 55 v^o

(1) Het oorspronkelijk Fransch stuk berust op het Stadsarchief te Gent, N^r 329 van het Inventaire van Van Duyse: afgedrukt in die taal bij Graaf Th. de Limburg-Stirum, Codex Diplomaticus Flandriae, D. II, bz. 370.