Dagboek van Gent van 1447 tot 1470. Deel 1

Vremt dync.

Item, tswoonsdaechs den VIII^en dach van der voorschrevene maent van decembre, quamen de saudenyers wedre van Biervliet, mids dat men se daer in nyet en hadde willen ontfanghen⁽²⁾.

(2) Zie Chastellain, Chroniques (uitg. Kervijn de Lettenhove), D. II, bz. 294; Stadsrekeningen over 1451-52, f^o 178 v^o. ‘Item Diederic van den Hoonackere ghinc by laste van den vorseyden III eerste hooftmannen te Biervliet omme de saudeniers weder te doen keerne...’

[p. 193]

Item, up den zelven dach tsnuchtens, track die bode van Ludicke wech met vele schoner ghiften, ghecleedt ghelyck den messagiers van deser [stede], ghevoedert met otters voederynghe, ende hadde ooc eenen capproen ghelyck den dekin van den smeden⁽¹⁾.

Item, doe openbaerde men ten Thoochuus uut, eenen brief van die van Brugghe, inhoudende andwoorde up 't versouck ende bede van deser stede, dat, wilde men afhauden van meer faits te doene ende elcken trecken in 't zyne, latende de zake in state XIIII nacht tyts, zy hoopten te verweervene an mynen gheduchten heeren dat al goedt zyn ende t'heenen goeden hende commen zoude; omme welcken brief 't volc grootelic ontpaeyt was, want hemlieden dochte dat zy nyet en hadden ghedaen faict, maer justicie ende recht uut ghebreke, enz. Ende zonden midsdien den messagier zonder andwoorde wederomme t'huuswaert.

(1) Zie de opsomming dezer giften in de Kronijk, D. II, bz. 119, en Stadsrekeningen over 1451-52, f^o 160 v^o en 201 v^o.