Dagboek van Gent van 1447 tot 1470. Deel 1

Voorghebot ende vertooghynghe.

‘Omme dieswille dat eeneghe persoonen van deser stede al nu ter tyt in 't Chauselet ghevanghen ligghen, daer up de hooftmannen gheene cause en weten of daer af yet claerlic t'harer kennessen commen es, zo eyst dat dezelve hooftmannen hu allen beteeckenen ende te kennen gheven dat, eys't by alzo dat eenich van hu allen, wie hy zy, zulcke persoonen of eenich van hemlieden weet te belastene van eeneghe zaken aenclevende der welvaert van deser stede oft insghelycx partielic, dat de zelve persoonen zullen commen ende ghehouden wesen⁺ dat secretelic hemlieden te kennen te ghevene, want de zelve hooftmannen ne zullen wesen in gheenen ghebreke, volghende ulieder eede alzo zy bezwooren hebben, omme al te doene dat zy schuldich zyn van doene. Ende eys't by alzo dat binnen den zelven derden daghe nyement en comt, zo zullen de zelve

+ f^o 53 r^o

[p. 194]

hooftmannen zulcke persoonen daer zy gheene presumptie of mesdaet up bevonden en hebben, up huerlieder eed ontslaen; ende waer 't by alzo dat naermaels yement, duslaneghe persoonen dus ontsleghen zynde, belaste of eenege fame ende name achter hemlieden deden gaen van eeneghe mesdaden, dien zoude men corrigieren in exemplen, enz. Dit was aldus uutgheleyt ter maerct den vrindach Xⁿ dach in decembre a^o LI.’