Dagboek van Gent van 1447 tot 1470. Deel 1

Dit 's de commissie⁽²⁾.

‘Wy scepenen ende raed van der stede van Ghendt, beede de dekenen, alle d'andere dekenen, ghezwoornen ende alle de goede lieden van der poortrien, neerrynghe ende weverien mitsgaders de vyf neerrynghen, 't welcke zyn de gheele drie Leden, over ende in den name van den gheelder stede ghemeenlic, doen te wetene allen lieden: uut dien dat onse gheduchte heere ende prince of zynen hoghen edelen raed ghelieft heeft, by grooter nyeuwicheden, te weerne ende af te nemene de baellius ende de dienaers van zynen weghen ghestelt⁺ binnen deser stede, al te grootelic jeghen de rechten, prevylegien ende vryheden derzelver stede, ende nochtan hem oft zynen edelen rade in zyn absentie wesende in de stede, van

(2) Stadsrekeningen over 1451-52, f^o 150 r^o: ‘Item ghegheven Johannes de Sceppere den ouden ende Jacop zynen zone ten beveelne van scepenen in hooscheeden over haerlieder salaris dienst ende moeyte die zy ghedaen ende ghehadt hebben int ordineren van der commissie van den Rechtere metten schriftueren ende anderssins doe anclevende X sc. gr.’.

+ f^o 41 r^o

[p. 164]

hem versouck ghedaen wesende van onsen weghen daer inne voorsien te werdene, ende daer naer verbeyt XIIII nacht lanc, naer 't verclaeren van prevylegien daer af mentioen makende, het en heeft hem nyet ghelieft daer inne te voorsiene, maer es dies ghebreckelic bleven, daermede de voorschrevene stede commen es alnu in grooten zwaren lasteghen dangiere ende vreesen, ende noch meer ghescepen waren te commene up datter nyet haestelik in voorzien en worde, alzo grotelicx van noden es; omme te belettene ende te scuwene de groote zware lasten ende inconvenyenten diere uutghescepen waren meer te rysene, ten laste van derzelver stede ende van den ghemeenen lande van Vlaenderen, dwelcke es een lant van rechter coopmanscepen ende van justicien, want men van Gods ende van rechs weghen altyts sculdich es te onderhaudene ende te oorbuerne recht, wet, justicie ende goeder pollicie zonder dissimulatie, alzo wel in baten ende profyten van ons gheduchts Heeren ende princen hoocheyt ende eerlicheyt, als up 't onderhauden van den rechten, vryheden ende prevylegien van deser stede:

Wy, by gebreke ende in de absentie van den baellius, zonder prejuditie van ons gheduchts heeren ende princen heerlicheyt, der vryheyt ende prevylegien van deser stede, ende voort, in bewaernessen van der heerlicheden ende rechten vooren verclaert, hebben gheordonneert, ghecommitteert ende ghestelt, om alle beters wille, ordineren, stellen ende committeren by desen presenten letteren, onsen gheminden vrient, Lievin Willemets, te wesene justicier ende rechtere in de stede van Ghendt ende al datter toebehoort, ende hebben hem ghegheven ende gheven vulle macht, recht ende wet te doene ende doen doene binnen Ghendt ende in al datter toebehoort, ende al te doene dat een goet ghetrauwe justicier ende rechtere sculdich es te doene ende dat zyne officie toebehoort naer de prevylegien, rechten, vryheden, costumen ende usagien der voorschrevene stede; voort ons gheduchts Heeren rechten, vervallen, exploten ende profyten, upheffene

[p. 165]

ende ontfane te ons gheduchts Heeren behouf, ende datte ghedurende tot onse gheduchte Heere ende prince believen zal baellius van zynen weghen te stellene alzoo 't behoort. In kennesse ende oorconscepen der waerheid ende onder den grooten zeghele van zaken deser stede van Ghendt huuthanghende. Den XVIII^en novembris anno LI.’

Dit ghelesen, zo dede hem dezelve secretaris up een cruuce⁺ in de veynstre blootshoofts staende, voor al 't volc doen ende zweeren den eed hier naer volghende:

+ f^o 41 v^o