Dagboek van Gent van 1447 tot 1470. Deel 1

Exame.

Item, 't saterdaechs nuchtens, den VI^e novembre, de voornoemde ghedeputeerde alle versaemt up den Colatie-soldre, zo ghynghen de XVIII die over die examen ghezyn hadden, ende beede de dekenen ten Chauselette, aldaer zy vraechden Pieter Tyncke ende Lodewyc D'Hamere of zy up haer voorschreven verkennen leven ende sterven wilden, daer up zy verandworden, veranderende 't zelve haerlieder verkennen ende daden 't stellen alzo zy daer inne leven ende sterven wilden; welcke andwoorde by den ghedeputeerden overbrocht was ten Colatiesoldre ende luut aldus:

‘'t Verkennen van Pieter Tyncke. Pieter Tyncke kendt dat den roup ghemaect om de wapenynghe, ende dat zy onder hem vieren, te wetene, Lievin Wicke, Loy Coolbrant, Lodewyck D'Hamere ende hy Pieter Tyncke waren te Berghen, in Henegauwe, in meester Pieter Bauwins camere voor zyn bedde, ende meester Pieter ende meester Jooris wasser by; daer was gheordonneert eenen roup ende de wapenynghe te makene, de welcke de zelve Pieter Tyncke beloofde te helpene makene.

Item, de zelve zeght dat M^er Pieter ende M^er Jooris hem veerchden dat hy zegghen wilde voor mynen gheduchten Heere, dat hy den roup ghemaect hadde met zynen ghezellen, hoewel nochtans datter M^er Pieter ende M^er Jooris zelve gheordonneert hadden.

Item, de zelve seght dat M^er Pieter ende meester Joris hem zeyden dat een wevere dusdanich eenen roup eens maecte in een stede metten heere, ende alle de ghuene, diere hem jeghen upstelden, waren doot ghesleghen, alzo zy seyden.

[p. 146]

Item, de zelve kendt dat meester Pieter ende M^er Jooris hemlieden alle viere den roup in ghescrifte ghaven, omme te ghevene mynen gheduchten Heere, ende Pieter gaffene mynen gheduchten Heere, alzo hy meent.

⁺ Item, de zelve kendt dat hy den roup anveerde om te commene by mynen gheduchten Heere, want anders en hadden nyet connen gheraecken.

Item, de voorschreven meester Pieter ende M^er Joris laste den vier voornoemde ghezellen, dat zy commen zouden metten roupe binnen Ghendt ende dat zy spreken zouden Pieter Bogaert ende Jacop Mast, omme te beziene wat zy an hemlieden hadden.

Item, zeyden voort de voorschreven M^er Pieter ende M^er Joris dat zy hemlieden bystandichede doen zauden, elc met XL oft vyftich ghezellen.

Item, kendt dat hy Pieter Bogaert ende Jacop Mast ontboden Pieter Tyncke in den Blenden Esele⁽¹⁾, ende daer vergaderden zy viere, te wetene, Pieter Bogaert, Jacop Mast, Pieter Tyncke ende Lievin Wicke, ende dat was om eenen paeys te makene tusschen Lievin Van Overackere ende Denys Notin, ende badt de voorschreven Pieter Bogaert Pieter Tyncke, dat hy ten besten spreken wilde omme den voorschreven paeys, dwelcke hy hem beloofde dat hy 't gheerne doen zaude.

Item, ter zelver plaetsen gaf Pieter Tyncke den zelven Pieter Bogaert ende Jacop Mast te kennene dat hem M^er Pieter ende meester Jooris gheseyt hadde, dat zy hemlieden groote bystandicheden doen zouden, by alzo dat sy 's te doene hadden, maer en noopte hemlieden van gheender wapenynghe.

Waer uppe Jacob Mast andwoorde: Ic en weet van gheender bystandichede. Ende ghect 'er mede, zegghende: Haddic den brief zelve willen brynghen, zy veerchden 's my.

Item, kent Pieter Tyncke dat Pieter Bogaert ende Jacop

+ f^o 34 r^o

(1) Op de Hoogpoort bij het Schepenhuis, zie Fr. de Potter, Gent, D. I; Jan Everaert, de baas dezer herberg, was de wijnleverancier der stad; zie Stadsrekeningen over 1451-52, f^o 170 r^o.

[p. 147]

Mast hem beloofden te commene tsaderdaeghs an de Coepoorte, in een taveerrekin, maer zy en quamen niet.

Item, zeght dat hy ghisternavont zeyde, huut vreese van pynen, de belastynghe van allen den anderen persoonen, want hy noynt negheenen persoon daer af en sprack.

Item, kendt voort dat hem meester Pieter ende M^er Joris seyde: Pieter, ghy zyt een vroom ghezelle; saudt ghy nyet willen dootslaen Daneel Sersanders? Waer uppe ic andwoorde: Neen, ic. - Doe vraechde zy waeromme: Het saude stappans ghedaen zyn met eenen bylkine, als hy in de kercke comt t' Sente Michiels.

Item, seght dat hy zeyde mynen gheduchten Heere, dat men hem geveercht hadde Daneel doot te slane, up 't welck myn⁺ gheduchte Heere verandwoorde, dat men 't in gheender manieren doen en zaude van rechte ende van justicien.

Item, kent voort, doe de mare liep dat Daneel, Lievin ende Lievin onthooft waren te Deeremonde⁽¹⁾, men seyde dat te Ghendt qualic stont ende datter noyt zo qualicken en stont, dat doe zeyde meester Pieter: De duvele, waut 's der messen!

Item, overvraecht Roele van Ronneke van alle zaken angaende den roupe ende de wapenynghe ende insghelycx Jan De Bels.

Item, bidt Pieter voorschreven dat men zo vele doe dat myne gheduchte Heere believe te commene binnen Ghendt, omme der redenen wille dat hy zeer zyn commuun bemint, ende by alzo dat hy wiste de natuere van der quaetheden ende valschede diere in luuscht⁽²⁾, by den toedoene van M^er Pieter ende M^er Joris, ende hy daer af te vullen gheinformeert ware, men sauder wel binnen Ghendt ghecryghen ende hy saudt al vergheven datter mesdaen was.’

Dit ghedaen, zo gheschiede noch up den zelven saterdach 't ghuent dat hier naer volcht.

+ f^o 34 v^o

(1) Op 7^en Oogst jongstleden.

(2) Diere in luuscht, die er onder schuilt.