Dagboek van Gent van 1447 tot 1470. Deel 1

[p. 148]

Voorghebot.

Te wetene, daer was een voorghebot uutgheleyt den XXVIII^e octobre lestleden, hoe dat alle poorters, insetenen in de stede commen zauden, binnen derden daghe, naer de publicatie van desen, up fugytyf te zyne gherekent van der stede, ende om dat daer af bevonden waren in ghebreke, zo waren uutgheseyt up den zelven saterdach de persoonen hier naer ghenoumt als fugytive: Eerst Jan Van Siccleer, Jan Van Huusse, meester Jan Van Loo, meester Monfrant Alaert, Lodewyc Steenmaer, Jacop De Mueleneere, Jan Van den Hende, Jan De Zaghere, meester Robbrecht De Saghere, Symon D'Hooghe, Gillis Van der Zwalmen.

⁺ Item, up den zelven saterdach dede meester Gillis Pappal, die XVIII jaer lanck hadde gheweest secretaris van scepenen, heerlick bewys van zekere grote sommen waer zy ghevaren waren, in zulcker wys dat hy vry ontsleghen wart.

Item, up den zelven tyt waren gheordonneert XII personen, uut elcken leden viere, omme te besouckene alle corruptien ende ongherechticheden die gheschiet mochten wesen, te wetene: Ynghelram Hauweel, Roelant Van Wedergrate, Jacop Vrient, Joos Van der Muelne, van der poortrien; Symon Boele, Jacop Van Crombrugghe, Lauwereyns Dullaert, Jan Van den Poele, van neerynghen; Jan Van der Zwalmen, Stevin Stameraert, Jan Goetghebuer ende Jan Cloosterman, van der weverien.

Item, 't snavens up den zelven tyt, wart eenen Ghyselbrecht De Meyere ghevaen, ende zyn zone, wonende up den Hoyhaert, ende waren gheleet in 't Sauselet, om dat zy overdoot ghequetst hadden Urbaen D'Ammans broedere.

Item, den VIII^e in novembre waren de drie examen, in der manieren vooren verclaert, vertooght den drie leden, elcken in 't zyne; ende was 't volc zeer beroert in de variatie, begheerende ende sloten hendelic de zelve persoonen tsnavonts

+ f^o 35 r^o

[p. 149]

weder te examyneerne een voor al, dat alzo ghedaen was als te voren, present alle de ghedeputeerden, in den put, by beede de dekenen, ende daer verleden zy vele meer dan zy noch yet⁽¹⁾ ghedaen hadden, waer af huerlieder verlyen ter zelver vierden en lester reyse toegheseghelt was.

Item, dsdysendaechs den IX^e novembris, omtrent der noenen, overleet Pertchevael Alaerts, voorscepene van der kuere⁽²⁾, in 't huus van Massemen, an den Callanderberch.

Item, tswuensdaechs den X^e novembre, waren de drie leden van Vlaendren up den Collatie-soldere, ende hoewel dat men hemlieden badt, zy en wilden gheen last anveerden by den prince hier omme te treckene, ten ware dat 't volc, dwelcke noch in huerlieder huusen van ambachte ende neerrynghen al ghewapent laghen, daer huute scieden, dat des nyet doen en wilde, vertrocken by dien zonder yet daer toe te doene.

Item, ten zelven daghe quam Pieter Bogaert up den soldere ende volghende zynder presentacien ende begheerten, was hy gheleyt in 't vanghenesse om hem te suverne van den voorschrevene belastynghe.

Item, ende al was 't dat meester Gillis Pappal, midsgaders⁺ andere personen, metten verkennene ende verleyene ende oock metten bedraghe van den voorschreven gheexamyneerde persoonen, binnen middelen tyden, ghesonden was by den prince, wesende te Berghene in Henegauwe⁽³⁾, om an hem ter verweervene dat hy den baelliu senden wille in zyne stede van Ghendt, om elcken recht, wet ende justicie te doene, naer elcx verdiente, met zulcken laste als daer toe behoorde; niet min, om dat daer af gheen voorzienichede en gheschiede van 's princen

(1) Noch yet, voormaals, tot hier toe.

(2) Hij was heer van Caprijcke; Jan Alaerts, gezegd Perceval, was voorschepene van gedeele in 1441-42, zie Memorieboek, D. I, bz. 214, 223, en hiervoor bz. 130.

+ f^o 35 v^o

(3) Stadsrekeningen van Gent over 1451-52, f^o 190 v^o: ‘Item meester Gillis Papal reed den VI^sten dach in novembre by laste van scepenen te Berghen in Henegauwen by onsen geduchten Heere ende prinche ende zynen grooten rade...’

[p. 150]

weghen, zo wart 't volc zo lancx zo meer in roeren ende scheen hem al voughende ter wapenen.

Tsdonderdaechs den XI^e novembris, de goede lieden met die van der wet ende andere ansiende, omme dmeeste quaet te belettene ende sonderlynghe de destrucxie van den volcke, dat al in grooter gramscepen elcandren hadden moghen bederven, pynden te behoedene, legghende huute in voorgheboden 't ghuent dat hier naer volght: