Dagboek van Gent van 1447 tot 1470. Deel 1

Vremt dynck.

Eerst, eer de Colatie sciet, zo wart overeenghedreghen ende ghesloten, by den drie leden van deser stede, dat Mer Gheeraert Van Ghistele, hoochbaeliu, Jan Quistebaut, onderbaeliu, Jacob Van den Velde, Joos Van Gryspeere, Luuc Van den Vrydaghe ende Pauwels Goethals, de vierde tsheeren cnape, mits huerlieder absentie ende wechtreckene, nemmermeer huerer gheen die officie bedienen zaude noch daer toe ontfanghen werden binnen Ghendt, maer daer af blyven versteken t' eeuweghen daghen.

Item, Jacop Donche, die ghetraut heeft M^er Pieter Baudins zustre, by wiens hulpe hy secretaris van den lede van der poortrien van scepenen van ghedeele, Jacop van Westhuuse, van M^er Pieter Baudins, sergiant van scepenen van der kuere, ende alle andere officiers die ghestelt waren van M^er Pieter Bauwins oft M^er Jooris De Bul, waren doen afgheroupen ende verlaten ende gheseyt nemmermeer officie t'hebbene binnen Ghendt.