Commentaar op het Hooglied


LXVIIJ Een ander glose Ooc mach men bi engaddi nemen Tranen die de sonden lemen Ende of dwaen in rechter rouwe Als ic in menigen wel bescouwe 5[regelnummer] In marien magdalene In sinte pieter dese woorden rene Biden tranen die si lieten Dair si die sonden mede verstieten
[Folio W14va]
Enen anderen sin moghen wi nemen 10[regelnummer] Die der letter wel mach temen Die wiin die uter druuen coomt Ter wonden ooc zere vroomt Als ons dat ewangeli doet cont Vanden man die was ghewont 15[regelnummer] Tusschen iherusalem ende iherico Dien die samaritaen also Vant. die ten seluen stonden Wiin ende oli in sinen wonden Boot: ende bant die wonden mede 20[regelnummer] Dat verstaen wi hier ter stede Dattie sondair hebben moet Wiin te sire sonden boet Dese wiin sal uan cyper sijn Dats uan bekerender herten fiin 25[regelnummer] Ende rouwe uanden zwaren wonden Dair hi in was half doot vonden Dair sal ooc oli wesen mede Die engaddi gheuet die stede Want in engaddi balsame wast 30[regelnummer] Die mit oli gheminghet vast Kersme maket dair wi bi merken Salicheit in allen kerken Dit mach ontfermicheit wel wesen Dair die sondair bi ghenesen 35[regelnummer] Als god in sine ontfermicheit In rouwe geuet salicheit Hier of is die bruut verhoghet Als si in desen woorden toget