Commentaar op het Hooglied

[fol. B16rb]

LIIIJ Wair bi men die bruut kent

Dine wanghen siin alsonder hone
Alse die tortelduue scone
pulchre sunt gene tue
sicut turturis xviij
¶ Die bruut soude licht ontfaen
Van berespinghe sonder waen
Des brudegoms wel scamelheit
Dair hair scier of wart bereit
Ene rode uerwe ende clare
Beide uan scaemten ende van vare
Dair om seit hi wel dat scone
Hair wangen siin al sonder hone
¶ In desen woorden sulwi proeuen
Gheestelijc die wi behoeuen
Wil wi dit te rechte verstaen
Die brudegom spreect dus aen
Der bruut: ende seit dine lieren
Siin scone na tortelduue manieren
Dit doet ons te verstane hair plicht
Dat hi niet seit diin aensicht
Is scone: mer hi seit dine wangen
Hier moet wi [te] rechte gangen
Inden werken die siin bequame
Gode sonder enighe blame
Want bi der herten innicheit
Kent god die siele ghereit
Der sielen aensicht is gheringhe
In alle werke ende in dinghe
In begeerten twe pointen sijn
Ghelike twe wanghen int aenscijn
Die alle werken in gode verchieren
Dit heten hier der bruut lieren
¶ Deen is die dinc die men doet
Dat si in hair si emmer goet
¶ Tander is dat men om gode
Die dinc doe om sine ghebode
Want doet die mensche enighe werke
Die siin inder duechden merke
En doet hise om gode niet
Puerlike : siin loen heuet verdriet

[fol. B16va]

 

Ter salicheit. mer is god sake

 

Lutterlike inden ghemake

 

So siin si gode wel bequame

 

Ende hebben der salicheden name