Commentaar op het Hooglied
(1975)–Anoniem Commentaar op het Hooglied–
Auteursrechtelijk beschermd
[Folio B4vb]
| |
¶ Tander point dat is ghicht
Die die minne bet uaster sticht
Want mit rechter minnen gauen
10[regelnummer]
Salmen altoes die minne lauen
Dit en seggic dair bi niet
Dat minne staet bi ghichten yet
Mer als ghichte uan minnen gaet
Die ghichte uan minnen danc ontfaet
15[regelnummer]
Mer gheefmen om datmen sal minnen
So moet die ghichte die minne uerwinnen
Ende men mint die gaue dan mere
Dan den gheuer dats onnere
¶ Terde point die werke siin
20[regelnummer]
Die uan minnen draghen scijn
Want die werke die uan minnen comen
Siet men wel ter doget vromen
Dit siet die salighe bruut wel an
Hoe si uan gode eerst began
25[regelnummer]
Hi is een uolcomen goet
Ende alre goede een vloeiende vloet
Bi hem siin wi dat wi siin
Dat is sine goetheit fijn
Sonder hem mach wesen niet
30[regelnummer]
Ende als die bruut die werke siet
Die hi doir hare heuet ghewracht
So comt si vut hairre macht
Van rechter minnen diese roert
Dan wart si in hem gheuoert
35[regelnummer]
Mit herten dien si zere begaert
Ende dien uander minnen aert
Spreken wille ende selue sien
Ende soetheit uan minnen tien
Ende spreket mit begheerten groot
40[regelnummer]
Wair is miins herten ghenoot
Hi come te mi talre stonde
Ende cusse mi mit sinen monde
Dat spreket. hi come selue te mi
In wien ic worden ben so vri
45[regelnummer]
Van minnen dat dinc en gheen
Anders minne dan hem alleen
| |
[Folio B5ra]
| |
Ende gheue mi hulpe ende raet
Want mi campelike altoes staet
Ende roere mi mit sijnre lust
50[regelnummer]
So bin ic suetelike ghecust
¶ Die derde brulocht dus beghint
Dair die siele wel in vint
Den brudegom der salicheit
Van wien hair is altoes bereit
55[regelnummer]
Chierheit uan alrehande doghet
Dair si zere mede wart verhoghet
Ende si bliuet in hem ghestade
Behoet uan sonden ende uan quade
|
|