Commentaar op het Hooglied

(1975)–Anoniem Commentaar op het Hooglied– rechtenstatus


XIIII Van drierhande personen die hier te gader spreken vander brulocht Eer wi uoort ter glose varen Moetic een luttel hier verclaren Dair verstandenisse of sal comen Die na deser lere gomen 5[regelnummer] Wi sullen redenlike verstaen Dat in desen boeke gaen Vier personen die al uan minnen Spreken wat si doen bekinnen Die bruut spreket ten brudegoom 10[regelnummer] Die brudegom weder mit goeden goom Spreket si an. ooc spreect die bruut Tharen spelen ouer luut Ende die brudegom spreect oec mede Tsinen ghesellen in uele stede 15[regelnummer] Dair om moetic uan einde toorden Scriuen elker mallics woorden Naden personen moetic mi voegen Entie glose rechte loeghen Nv sulwi al hier verstaen 20[regelnummer] Dat wi te bet den sin ontfaen Van drie brulochten sal ic scriuen Die men mit gode hier bedriuen Mach: ende sal ter salicheit ¶ Teerste hoirt dair toe ghereit 25[regelnummer] Hoe god entie menschelicheide
[Folio B3vb]
Vergaderden in marien beide Dair om sal ic openbair Vander maget dit maken clair Want si was die reine zale 30[regelnummer] Dair in die brulocht alte male Ghesciede doe die twee naturen Vergaderden in saligher vren Ende mensche wart god ende god mensche Nochtan bleef elc gans na wensche 35[regelnummer] Yeghelike in sijnre nature Twe in enen vleesche pure ¶ Dander brulocht sulwi merken In cristum ende der heiligher kerken Dat heten wi die kerstenheit 40[regelnummer] Die te gode is gheleit Dese brulocht wart ghedaen Doe cristus ginc ant cruce staen Dair vergaderden doe ghereit Cristus entie kerstenheit 45[regelnummer] Want na kerst siin wi gheheten Alle kerstine suldi weten Dese trouwe noch vaste duert Die emmer en wart verstuert Die kerstenheit mach pine liden 50[regelnummer] Mer sine mach in ghenen tiden Veruaren dat si wart te niet ¶ Die derde brulocht ons ghesciet Tusschen cristum onsen here Enter sielen mit groter ere 55[regelnummer] Als die siele mit ganser minnen Te gode voeghet so hair sinnen Dat si vter weelden gaet Ende hair te male in gode zaet So dat si anders niet en gheert 60[regelnummer] Dan dat hair van gode weert Dese brulocht ghesciet te wensche Salichlike in elken mensche Als hi te male wart gheuoert In gode uan sonden omberoert 65[regelnummer] Van desen brulochten alle drien
[Folio B4ra]
Moetic dese glose tien Ende elkerlijc dat sine gheuen Als ter wairheit best comt euen ¶ Die vierde brulocht latic bliuen 70[regelnummer] Want dair en wil ic niet of scriuen Mer als die brudegom sal comen Te middernacht tonsen vromen Dair men vrilike roepen sal Gaet vut ghemoet hem ouer al 75[regelnummer] Ende wi dan gaen mit bliden zinne Mit hem ter brulocht inne So sulwi dan die brulocht zien Dair ons nemmer vte tien Mach enigherhande sake 80[regelnummer] So bliuen wi ewelike te ghemake Ende wat onse herte begheert Dat en wart ons niet verspaert Van marien heb ic gheseit Hoe si begheerde gode ghereit 85[regelnummer] Te cussen ende an hair te drucken Dair wi salicheit vte plucken Souden: ende wie mach dat volscriuen Hoe dicke si bouen alle wiuen Reine custe dat suete kint 90[regelnummer] Ihesum dat si zere mint ¶ O lippen mont ghebenedijt Dair alle ulecke op vertijt Die wairdich te cussen wairt Den gods sone die onghespairt 95[regelnummer] Ons mit sinen bloede looste Ende in salicheit vertroeste ¶ Doe die menscheit hadde verstaen Ende dicken wairliken ontfaen Van uaderen ende van propheten 100[regelnummer] Die hair die wairheit lieten weten Dat god selue soude comen In hare naturen tharen vromen Ende woutse nemen teenre bruut Sprac si uan minnen ouer luut 105[regelnummer] Want si uan minnen was ontfenget
[Folio B4rb]
So dat si siins willen ghehenghet Si sprac hi come ter seluer stonde Ende cusse mi mit sinen monde ¶ Dit woirt is aldus te merken 110[regelnummer] Die mi mit woorden ende mit werken So dicken heuet them gheroepen Hi come selue mi copen Ende siin mont cusse selue mi Dat spreket ic beghere dat hi 115[regelnummer] Come tieghenwoirdichlike Ende lere mi salichlike Mit siinre doghet: wat hi ghebiet Dat en wil ic laten niet Ende dair ic mede mach uolstaen 120[regelnummer] In sine minne sonder waen Hi come in sueter sameninghe Ende gheue der salicheit leringhe Ende bringhe mi der herten vrede Ende veriaghe mine blinthede 125[regelnummer] Ende allen twiuel driue uan mi Dat ic altoes in hem si vri Ende make mi seker ende vast Te draghen siinre minnen last ¶ Dit cussen wart al uolbracht 130[regelnummer] Alst in gode was voirhacht Doe die reine lere ons heren Wart gheuoert mit groter eren Ouer al die werelt breit Doe custe god die kerstenheit 135[regelnummer] Mitten monde sire scrifturen Die die apostolen tallen vren Predikeden ende makeden cont Oec custe si voort gods mont Doe hair quam die heilige geest 140[regelnummer] Diese troest mit sire volleest So datsi alle daghe meerde Ende in minnen niet faelgeerde Reden die die siele verclairde Die si heuet van rechter airde 145[regelnummer] Te vrien kuer des willen. leit
[Folio B4va]
Ende wijst ter rechter ondersceit Dat die gheest te rechte sal kiesen Dair hi niet ane mach verliesen Als die siele dan wel verstaet 150[regelnummer] Bi reden hoe dese werelt gaet Ende dat ghene ghestadicheit In haren dinghen is gheleit So merket si of enige dinghe Hair behaghen sonderlinghe 155[regelnummer] Si merket hemel airde locht Ende wat hier heuet der airden vrocht Ende menigherhande ander saken Die god woude om den mensche maken Doch proeft si wel dat dinc ne ghene 160[regelnummer] Bi hem seluen is allene Mer dat wesen moet ene macht Die alle dinc heuet ghewracht Vte desen proeuen tiet si dan Dair si gode meest comet an 165[regelnummer] Ende merket dat hi allene is here Ende gheweldich emmermere Dair na doet hair gheloue verstaen Wat si te rechte sal aneuaen Ende hoe si gode mit allen sinnen 170[regelnummer] Dienen sal ende altoes minnen Mer als si proeuet in rechter merken In hare uerlossinghe gods werken Die cristus heuet doir hair gedaen Dair si mede hulde heuet ontfaen 175[regelnummer] Dair si te uoren verloren was Dus merket si hoe si ghenas Ende minne wert in hair ghemeert Ende an cristum al ghekeert

Vorige Volgende

XIIII Van drierhande personen die hier te gader spreken vander brulocht