Die historie van Christoffel Wagenaer

[p. 118]

¶ Christoffel Wagenaer gaet by eenen anderen voornoemden Tovenaer, om raet ende hulpe tot zijn Ooghe.

ALs dit nv dus geschiet was, ginc hy tot een vermaert Professoor in Magia, ende vraechde of hy hem niet ende¹ wist te helpen, dat hy zijn ooge mocht weder crijgen, ende of hy dien geest die den anderen gedient hadde, by hem conste doen comen? den Professor sprac neen, want ick niet en weet wattet voor een geest is, ooc niet hoe zijnen naem is, doch ten lesten bedacht hy hem, ende vraechdent zijnen Preceptor, die seyde hem wat het voor een [118] geest gheweest was, doen beswoeren sy die Geest ende sy vraechden hem, of hy Wagenaer zijn Ooge weder conde gheuen, die Gheest sprack neen, hy moet dat van mijnent weghen lijden, Ende alsoo bleef het daer by, Ende Wagenaer en conde zijn Ooge niet weder crijghen, doch so riet hem dien seluen Magius, dat hy in Lappenlandt trecken souden, wandt daer seer veel Toovenaers woonden, alsoo dat sy dat gheheele Landt schier vervulden, ende conden soo veel Consten, dat sy schier alle Natien Meester waren, ende soo verre hy daer comen conke² so soude hy mogelijck yemandt vinden, die hem raet hier toe soude connen gheuen, want sy in sulcke dinghen seer wel gheoeffent waren, ja oock also gewis, dat haer gene dinghen en faelgeerden, ende bouen dat, soo zijn sy van Natueren, ghelijck die Geesten seluer, want sy connen somtijts haer lant also betooueren, dat het niemandt vinden en can, al sochten sy een gheheel Jaer daer ouer, ende daer toe connen sy oock op het Waeter gaen, ende oock om hooghe in die Locht vaeren, sonder die Gheesten hulpe, het welcke ghy daer sult ghewaer worden, so verre ghy³ daer in coemt.

1 Lees en

2 Lees conde of conste

3 Als gij namelijk