Die historie van Christoffel Wagenaer

¶ Hoe Christoffel Wagenaer te Padua Schole hielt, ende leerde die swarte Const.

ALs nv tot Padua den Naeme van Christoffel Wagenaer hoe langer, hoe meerder bekent wert, so quamender veel Studenten tot hem, die met hem disputeerden ende Kennisse maecten, ouermits om dat sy groote begeerte hadden tot die swarte Const. Ende baden hem seer, dat hy woude wat voornemen³, ende haer leeren, want [87] sy en meynden niet, dat hijt met Duyvels bedroch dede. Maer Christoffel Wagenaer hadde haer luyden te voren wijs gemaeckt wat hy dede, dat dede hy met een goede Conscientie, want het waren altemael goede Geesten van Godt geschapen, tot dienste ende profijt des Menschelijcken gheslachts, die hy

3 Zich ergens toe zetten, iets ter hand nemen

[p. 90]

dan tot hem wiste te crijghen door Natuerlijcke middelen, de welcke hem dan eenen tijtlanck dienen moesten. Hy seyde oock, dat hy eens menschen geest so haest als die Mensche gestoruen ware, wederom in zijn gedaente dwingen conste, hem te ghevalle te zijn ende te doen wat hy woude, die hy dan oock al wiste te laten gaen wanneer hy wilde, ende daerom sy dese dingen so seer geloofden, begeerden sy het so veel te meer te leeren. Ende Christoffel Wagenaer nammer sommige tot hem, die hem veel Gelts gauen, die hy leerde die besweeringe, ende sommighe Specien inder Conste: Als die Geometriam, Hydromantiam, & Capnomantiam, &c.¹. Ende sonderlinghe oock die geheele swarte Conste, also dat sy in corter tijt seer na Meester waren.

Onder dese studenten warender dry, alle met namen Johannes geheeten, die hen voornamen te varen int Eylant Syciliam, om dat te besien. Waerom dat sy begonsten haer Gecx pijpen wt den Sac te trecken², sprekende alle drie die besweeringe, ende maeckten henluyden eygene Characteren, ende Cruys teeckenen, ende was den Duyvel also besworen, dat hy henluyden t'allen vren conste twaelf Walsche mijlen onsienlijck door die Locht voeren. Ende hen was bevolen, dat sy een woordt niet en moesten spreken, oft sy vielen van des Duyvels Waghen.

Ende doen sy nv op die Reyse waren, haestelijck [88] door die Locht varende, onsienlick³ mocht yemant van haerluyden wat vergeten zijn, oft hy en moest niet wel sitten oft zijn hooft mocht hem omdraeyen ende hy riep met luyder stemmen inde locht, hout, hout, daer valdt hy nederwaerts, alsoo dat hem zijn hooft opgheborsten was, die ander twee voeren vast wech, tot dat sy wijt gecomen waren

1 De toekomst voorspellen uit water en uit rook

2 Hun tooverkunsten voor den dag te halen

3 Onvoorziens

[p. 91]

op die groote Zee, daer begint een van haer beyder te sien, het Eylant Sicilia, want hy die ghelegentheydt wel wist, die geleert hebbende, wt der Caerten ende Schipvaert, wt dien eynde¹, hy seyde, ick sien Sicilien, daer liet hem die Duyvel van stonden aen inde Zee vallen, op dat hy soude leeren swemmen², ghelijck eenen Muelensteen, maer den derden die zijn Const seer lief ende weert hadde, heeft het Eylant van Sicilien, vier dagen lanck wel doorsien, ende op den sesten dach wederom tot Padua ghecomen, heeft Wagenaer al vertelt, hoe dattet met beyde zijn metgesellen al toegegaen heeft, ende dat hy in Sicilien ghesien hadde, den grooten Berch AETNA, die nv noch sonder ophouden stondt ende brande, die sommige duysent Jaren al gebrandt hadde.

1 Waarom

2 Drijven