Die historie van Christoffel Wagenaer

¶ Hoe Wagenaer te Florentzen een Peert verkofte.

NAe dat nv Wagenaer veel Gelts te Padua verteert ende met die hoeren om gebrocht hadde, so moeste hy pracktisieren om meer te crijgen, so nam hy voor hem niet meer te Padua, maer op een ander plaetse zijn schelmstucken te ghebruycken¹, Hierom trock hy na Florens ende kofte daer twee Muil-esels sonder Gelt, als hy te Florens quam, sach hy eenen man die twee Muylesels hadde, de welcke hy vraechde of hy die vercoopen woude? den Man sprack Ja Wagenaer vraechde hoe duer? den Man loofdense² 50. Croonen, Wagenaer lachte, ende boot hem 5. Croonen, den Man antwoorde, ick woude lieuer datse de buel³ hadde, eer ickse om so loosen⁴ gelt gheven soude, maer Wagenaer woude hem niet verlaten⁵, maer liep hem na, ende bode hem voor den eenen 4. Croonen, daer hy te vorens 5. gheboden hadde, die vercooper wert gram, ende verstondt dat hy met hem Geckte, neemt eenen Voet, ende stieten van hem, also dat hy hem gheraecte voor zijn scheen oft been, het welcke van stonden aen gebroken was, Waghenaer viel daer neer, ende crees⁶ seer luyde, die luyden loopen daer henen, ende vonden dien kruepelen daer ligghen, den Peertvercooper wert van de Ouerheyt gevangen ende aengetast, ende hy bekende dat hyen wel gestooten hadde, maer [86] niet seer, het welcke hy oock bevestichde met sweeren. Daer liet den Raet den Creupelen besien, ende wordt bevonden, dat den breucke versch waer, also dat hem opgeleyt

1 In praktijk te brengen

2 Vraagde er voor

3 Beul

4 Gering, armzalig

5 Loslaten

6 Krijschte

[p. 89]

worde, dat hy hem met den Creupelen verdragen moeste. Ende het wert aldaer ghewesen, dat Christoffel Wagenaer hebben soude die twee Muyl-Ezelen. Als nv Wagenaer die twee Muyl-Ezelen hadde, so gaf hy den Barbier¹ eenen, die zijn Been ghemeestert hadde, het welcke hy in dry dagen al gesont hadde. Den anderen Muyl Ezel veranderde hy in een schoon Peerdt, het welcke hy te coop hadde, ende lietet den Hertoch sien ende aenprijsen. Als den Hertoch dat Peert sach, stont hem dat seer wel aen, aengaende die gedaente zijns lijfs, die verwen ende seer springers², also dat desghelijcx in Italien niet gesien, oft gevonden en worde, ende gaf hem dry hondert Croonen daer voor. Ende als Wagenaer dat Gelt wech hadde, opten derden dach wert het Peert wederom eenen Muyl Ezel, gelijck het te voren geweest hadde. Also creech Wagenaer wederom Gelt, ende conste also te beter slempen ende bancketteren.

1 Chirurg

2 Waarschijnlijk te lezen springens; zijn seer springen, ‘zijne hooge sprongen’