Die historie van Christoffel Wagenaer

[p. 53]

¶ Hoe Christoffel Wagenaer tot Weenen een Gasterije hielt, ende hoe hy van daer tot Padua in Walslandt Reysde.

ALs Christoffel Wagenaer nv wederom wt het Schip gegaen was, so ginck hy vast al die Stadt door-wandelen, ende besach het rontomme, Ende als zijne Cueren¹ vast onder die Luyden begonsten te comen, so warender sommige goede Teergesellen², die haer by hem voechden, ende maecten kennisse met hem, ende noodich[49]den hem te Gast, om dat sy geerne wat Cortswijl van hem ghesien hadden, maer hy sloeget haer af, ende en woude met haerder niemant gaen. Maer hy seyde haer, so sy lust hadden met hem in zijn Logiment te gaen, so warense hem willecome. Want hy seyde: Ick heb hier voor die Stadt eenen fraeyen Borcht oft Casteel staen, daer ick v alle sal goet Logijs doen hebben, ende oock goet Tractatement³, wt gesondert Glasen ende Bekers heb ick ghebreck, die soudense mede brengen. Een yeder ginck na Huys ende haelden haer beste Drinckbekers van Silvere ende vergulde, diese hadden, want yegelijc woude voor die meeste daer angesien wesen, ende sy quamen al op die bestemde plaetse by malcanderen.

Hierentusschen schickte⁴ Wagenaer synen Knecht Claes Muller, na alderley Cruycken ende Cannen, ende liet hem die voor henen dragen, ende beval hem dat hy hem onder die Poorte verwachten soude, want hy woude met die andere goede Heeren volgen. Ende als sy nv alle te samen voor die Poorte quamen, so wees hy haerluyden een schoone Huysinghe, het welcke seer Constich getimmert was, ende hoe wel sy daer te voren geen Huys ghesien en hadden, so bepraten hy haer nochtans, ende maecten haer wijs, dat

1 Tooverkunsten

2 Kameraden in het slempen en brassen, bon-vivants

3 Eten en drinken; lees tractement, d. i. tractatie

4 Zond

[p. 54]

hijt in een Maent hadde laten bouwen. Ende als sy nv int Huys quamen, so was het vol van Huysgesinne, als Joncvrouwen, Knechten ende Maechden, ende het was daer so Lustich ende Aerdich toegemaeckt, dattet wonder was, also dat sy meynden, dattet een Vorsten Huys geweest hadde, ja sy bewesen hem oock Vorstelijcke Eere, daer liet hy die Luyden aen die Tafel gaen. Doen quamen zijn Dienaers, ende brochten daer costelijc[50]ken Dranck op, wel een vre lanck. Doen quamen daer Jonckvrouwen met Zitteren¹, ende alderley Lieflijck Speel, also dat sy van haer Leuen geen schoonder Musijck gehoort en hadden. Terstont quamender twaelf Apen, die maeckten eenen ronden dansse, ende oock een Galiaerde, gelijckmen in Walslandt, in Vranckrijck ende Spaengien, ende Nederlant, ende op sommige plaetsen in Duytslant plach te danssen. Hier na liet hy de Cost op de Tafel brengen, seer statelijck, gelijck oft eens Vorsten Tafel gheweest hadde, ende liet daer op brenghen Vngersschen², Walsschen, ende Spaensschen Wijn met alderley Malvesye. In summa, hy lietse alle seer Costelijck tracteren. Alsmen nv schier³ gheten hadde, so quamen daer dry Beyren, die hielden ooc eenen dansse, ende beten daer ouer malcanderen seer nijdich, so dat het bloet daer na volchde. Daer na quamen cleyne Mannekens ende Maechdekens, die ontrent een Spanne lanck waren, die dansten oock alderley seltzame ende ontuchtighe danssen, ende verdreuen henluyden also den Tijdt seer wel. Na den Eten gingen sy op een groene plaetse, daer was het Edel Vrouwen getimmer⁴, daer hoorden sy weder alderhande Musijck speel: daer begonsten sy te danssen, ende dit duerde ontrent totten Middernacht, so lange tot datse moede waren. Alsmen des

1 Cithers; het Hd. heeft Saitenspielen

2 Hongaarsche

3 Spoedig nadat men

4 De aanzienlijke dames

[p. 55]

danssens afliet, gingen sy aen een Water, dat rontomme het Huys liep, staen visschen, daer vingen sy vele seltzame ende wonderlijcke visschen, so dat sy dergelijcken noyt gesien en hadden, maer sy en constender gheen voort gebrengen, doch Wagenaer verbodet haer, datter niemant met af t'huys nemen soude. Onder alle wasser een wat nieusgie[51]rich, die vinck eenen wonderlijcken vissche, ende hy verberch hem heymelijc, ende nam hem met t'huys.

Als het nv inder Nacht quam, namen die Vrouwen haer Afscheydt, ende ginghen wech, maer die andere bleuen inden Hof, Aten ende droncken wederom, ende waren lustich, ende die eene hielt den anderen goet geselschap, tot dat sy alle moede waren, doen quam haer allen eenen soeten slaep aen, alsoo dat sy haer niet langer en consten onthouden, ende vielen in eenen vasten slaep.

Als nv Christoffel Wagenaer synen tijt sach, so nam hy alle die zilvere ende vergulde Bekers, diese met gebrocht hadden, ende ginck van daer, ende liet die goede slockers liggen slapen, tot inden claren middach, doen worden sy eerst wacker, ende worden gewaer, waer datse waren. Als sy opsagen, stont die Galge bouen haer hooft, daer noch Dieuen aenhingen, die Raderen stonden beneuen haer, die Knaken¹ ende Beenen lagen beneuen haer, ende in plaetse van haer zilvere Croesen, vonden sy Doots Coppen. Terstont holpen sy malcanderen wt die Galge plaetse, ende gingen na Huys, ende sy en seyden malcanderen niet vele hiervan, op datse ongefexeert bleuen. Maer daer wasser een die hadde wt de Schole geklapt, ende die haddet zijne Vrouwe geseyt, die welcke so lange sweech, tot datse by de menschen quam. Den eenen die den visch met genomen hadde, als hy t'Huys quam, worde hy daer aen denckende, so wilde

1 Knoken, beenderen

[p. 56]

hijse voor den dach brengen, doen wast een leelijcke Padde, also dat die anderen verschricten, diese sagen. Hy nam die Padde, ende werpse ten venster wt, ende sy quam al weder. Ten tweeden mael schrubden¹ [52] hyse wt den Huyse, noch quam sy al weder. Ten lesten liet hyse in de Donau dragen, noch quam sy al weder. Eyndelijck liet hyse weder aen de Galge dragen, daer bleef sy. Also heeft Christoffel Wagenaer desen mael met die dronckaerts gehandelt, ende haer genoech bedrogen, doch het verginc haer noch ten besten, dat sy alle gesont daer af quamen, so dat niemant beschadicht en worde.

1 Stopte ze onder den grond