Die historie van Christoffel Wagenaer

[38] ¶ Hoe dat Christoffel Wagenaer synen Gheest by hem dede comen, ende met hem een ghespreeck hielt vander Hellen, ende van die boose Gheesten.

ALs nv Wagenaer dese boetse wtgericht hadde, so nam hy voor synen Geest Averhaen by hem te doen comen, so ginc hy wandelen buyten die stadt in een Dorp, daer socht hy ghelegentheyt om met synen Geest alleen te spreken, so vant hy ten lesten een woeste Oude Badtstoue, die wijt van die ander Huysen stont, daer ginck hy met synen Medegheselle Claes Muller in, doch hy liet Claes Muller voor die Deure staen, op dat hy toe sien soude, of daer yemant quame, dat hy hem dat seggen soude. Doen vorderde hy synen Gheest by hem, die welcke terstont quam, ende vraechde hem wat hy begeerde? Wagenaer hief aen, ende seyde: Ick hebbe sommige vragen aen v, die begeere ick, dat ghy my wilt grondelijck, ende sonder leugen te kennen geuen. Als namelijck, van de Helle, ende van de Duyvelen, hoe veel dat uwer daer in is, ende waer die Helle is, ende hoe groot datse is, ende hoe dattet daer binnen gelegen is? Den Geest weygerde hem dit, ende seyde, dat hy hem sulcke hooghe dinghen niet vragen en soude, ende dat hy wat anders vragen soude, want het doch so lange niet en soude verloopen, oft hy en soude het doch wel selfs sien, maer so hy sus² wat anders begeerde te weten van den Loop des Hemels, oft andere heymelijcke natuerlijcke dinghen, die woude hy hem sonder weygheren wel openbaren.

2 Anders, overigens

[p. 44]

Dewijle Christoffel Wagenaer met synen geest [39] Averhaen dit gespreeck hiel, so sach Claes Muller die Boeren comen geloopen met haer Honden ende Mestgaffelen¹, ende liepen na die Schuere toe, ende wilden dese twee gevangen nemen, want sy meynden datse wat anders voor handen gehadt² hadden, ende een Vrouwe die hadse daer in sien sluypen, die hadde haren Man sulckx gheseydt, ende den Man voorts die ander Boeren.

Nv Claes Muller dit siende, begonste te roepen, doen liep Christoffel Wagenaer daer wt, ende sach die Boeren aencomen, doen begonste hy te loopen, ende quam aen een Water, het welcke tamelijcken breet was, also dat hy daer niet wel ouer en conste comen, Doen nam hem Averhaen fijn³ inden middel, ende brocht hem daer in een Oogenblick ouer. Doen sach hy om, ende die Boeren volchden hem al na: Maer synen Geest Averhaen verblinde die Boeren haer Oogen, also dat sy geen Water voor Lant en kenden, so dat sy van bouen neder int Water plompten, die eene voor, die ander na, ende baeyden haer seluen rechtschapen⁴, want sy malcanderen al weder in togen, alsser een meynde wt te comen, maer dewijle dattet Water niet diep en was, quamen sy, daer al weder wt, als sy haer wel gewassen hadden, ende sagen als verdroncken Catten. Doen begonste Christoffel Wagenaer synen getrouwen Dienaer te missen, want twee Boeren hadden hem ghecregen, ende namen hem ghevangen. Met dien so bedochte hy eenen vondt, om hem weder te verlossen. So sandt hy synen Geest Averhaen daer henen in de gedaente van eenen Aep, ende die liep voor die twee Boeren henen, die sprongh' ende maeckte lustige boetzen, also dat sy Claes Muller verlieten, [40] ende liepen den Aep na, de welcke hem al hielde als off hy half Lam

1 Mestvork

2 Voor gehad

3 Keurig, netjes

4 Recht zeer, heel goed

[p. 45]

gheweest hadde, ende moede van loopen, so liepen sy hem seer begeerich na, also dat sy oock voeren gelijck die ander twee gevaren waren, ende wiesschen haer oock seer wel. Christoffel Wagenaer sach dit Speel aen, daer hy seer grooten lust¹ in hadde. Den Aep brocht Claes Muller oock ouer dat Water, ende quam alsoo weder by synen Meyster. Doen gingen sy voortaen², ende reysden t'samen in³ Landt te Bhemen.

1 Schik

2 Verder

3 Lees int