Den Bloem-hof van de Nederlantsche Jeught beplant met uijtgelesene Elegien, Sonnetten, Epithalamien, en gesangen etc

Nieu Liedt, op de voys: Schoon lief wilt my troost gheven. Oft op den 6. psalm.

1.
Ghelijck der sonnen straelen
Verlichten al de paelen

Des werelts wijt end breet,

Ghelijck de roose schoone
In d'hoven spant de croone
Al ist Narcisso leet.

2.

Ghelijck als gheen musijcke

Des Nachtegaels ghelijcke
Int wout ghevonden wert,
Gelijck als d'ander pluymen
Voor d'Arents moeten ruymen,
Als voor de hont het hert.

3.

Ghelijck de Pauw hoveerdich

Is pijs en eere weerdich
Ver boven alle hen,
Ghelijck haer veders ooghen
Haeren lof soo verhooghen
Dat zy haer self niet ken.

4.

Alsoo is oock een vrouwe

Die door de echte trouwe
Haer man te hulpe staet:
Een vrouwe die met eeren

[p. 81]

 

Alomme can verkeeren

 

Waer sy oock heenen gaet.

 

 

 

5.

 

Die sulck is een Pauwinne

 

Int huys, als door haer minne

 

Den man all-om verschijnt

 

Voor wien blijft gheen misbaeren

 

Int huys, als voor de Aerens

 

Pluym, alle pluym verdwijnt.

 

 

 

6.

 

Haer woorden even rijke

 

Des Nachtegaels musijcke

 

Al verr te boven gaen

 

De roos-reuck moet beswijcken

 

By haer deught te ghelijcken

 

Als by de Son de Maen.

 

 

 

7.

 

Haer suyverlijcke ooghen

 

Der sonnenglans vertooghen

 

In haer ghesloten huys:

 

So sy maer al haer daghen

 

Haer man soeckt te behaghen,

 

Van waer comt sy aen cruys?

 

 

 

8.

 

Nu siet sy haere rancken

 

Of nae haer borsten jancken,

 

Of nae haer moeders kus:

 

Nu siet sy hare kinders

 

Nae haeren wensch (volhinders)

 

Nu siet s'haer minnen blus.

 

 

 

9.

 

Voorwaer de gheen behaghen

 

Ende hebben in dees daghen

 

Zy' ergher daghen weert,

 

Dan als dat slechte leven

 

Dy worden can ghegeven,

 

Indien ghy t'slechts aenveert.

 

 

 

10.

 

Wanneer u een comt vraghen

 

Die in u heeft behaghen

 

(Reyn maeghdelijcke saet)

 

Wat hout ghy u soo banghe

[p. 82]

 

Gheeft hem t'woort en verlanghe

 

Eer hy weer van u gaet.

 

 

 

11.

 

Tis teghen uwen baete

 

Te spreecken al te laete

 

Als dy dijn liefste vraeght,

 

Wilt schaeme doch neerlegghen

 

End in tijts, Iae, Iae, segghen

 

Want hy dy doch behaeght.