Den Bloem-hof van de Nederlantsche Jeught beplant met uijtgelesene Elegien, Sonnetten, Epithalamien, en gesangen etc

Raedtslach der goden.

1.
THeylich groot Convent der Goden

In den Melckvvech vvas vergaert

Duysent duysent sieltiens vloden

Daer rontsom in liefd' ghepaert.

Een vergulden looven Tent

Had Hedone fraey ghespannen
Om vvt haren raet te bannen

Tvveedracht die daer schuyld ontrent.

2.
Doen sy tsvverelts cloot aensaghen

D'aerd' met vvat'ren omghevaet

Namen sy een groot behaghen

Inden Menschelijcken staet

Jupiter selfs schiep ghenoecht

Dat Natuer', door sijn bevelen
In soo veel verscheyden deelen

Alles soo vvel had ghevoecht.

3.
Dies seyd hy Mercur mijn soone

Gort u vleugheltuygh end' gaet

Seght Natur' u suster schoone

Dat sy coom in onsen raet

Hy is snellijck heen ghespoeyt

Dalend' in Centrum der aerde
Daer Nature tijdlijck baerde

Alles vvat ter vverelt groeyt.

4.
Sy hoord' aen haers Vaders stemme

End' haer schoon verciersel nam

Glas, Fonteynen vvt haer memme

Spronghen alsins daer sy quam

Tvvaelf Ionckvrouvven volghden haer

Die het eelste aller dinghen
End' goed' gaven sonderlinghen

Statich droeghen voor end' naer.

5.
Jupiter seyd' ick bens sinne

[p. 40]

 

Een schoon beeldt te maken nu

 

Dat het alles lockt tot minne,

 

Dies heb ick ontboden u,

 

Dat ghy t'aerdichst van u schat

 

In dit maegdeken sult voeghen:

 

Al de goden lieflijck loeghen

 

Doen sy t'saghen blanck end' glat.

 

 

 

6.

 

Stracx Nature ginck bepoghen

 

Om te cieren t'jeugdigh beelt,

 

Sonne straeltjens in haer ooghen

 

Heeft zy minlijck sterck ghedeelt:

 

Tvvitste dat suyver besit,

 

Eene Lely ginck sy spreyden,

 

Over t'glat vel sonder beyden,

 

T'gantsche lichaem vverde vvit.

 

 

 

7.

 

T'joncxste bloeysel van tvvee Rosen

 

Blies sy op haer caeckskens sacht,

 

Caeckskens die daer af noch blosen,

 

Putten vvanneer dat zy lacht:

 

Haer lipkens een jalousij:

 

Aen de rijpe Crieken maken,

 

Tandekens die niet en schaken,

 

Van Yvoir, gheperct daer by.

 

 

 

8.

 

Voorts de Goden altemale

 

Deylden gaven elck vant zijn:

 

Suada gaf haer soete tale,

 

Juno staetheyt int aenschijn,

 

Venus een minlick ghesicht,

 

Pallas rijpheyt van verstande,

 

Voorts de reste alderhande

 

Watmen vveert hout toeghesticht.

 

 

 

9.

 

T'kint Cupido sijnen booghe

 

Gaf, die sy hem noch vvel spant,

 

Vvant in haer vlam luyckend ooghe,

 

Ick hem laest verborghen vant.

 

Met haer quam hy in dit dal

 

End is steeds by haer ghebleven,

 

VVant haer soetheyt is zijn leven

 

End haer schoonheyt zijn beval.

 

 

 

10.

 

Alsoo quam t'volmaeckste vvesen

 

(Een tvveede Pandora schoon)

 

In dees vverelt doen by desen,

 

Liefd' en eer daer namen vvoon,

 

Schoonheyts Lampe voor end' na.

[p. 41]

 

Volmaectheyts lof soud u comen,

 

Nais een fout uytghenomen,

 

Ghy niet vvel condt segghen jae.

Maugre envie.