Den Bloem-hof van de Nederlantsche Jeught beplant met uijtgelesene Elegien, Sonnetten, Epithalamien, en gesangen etc


Courante. Si cest pour mon pucellage. O Ghy stercke Godt der minnen Waerom datmen u verblint Over al gheschildert vint? T'mach wel dat ghy niet en siet, Ick gheloof het nochtans niet. Siedy niet, hoe condy gissen Dat u schicht soo seecker gaet? Blinden houden doch geen maet, Ghy condt schieten sonder missen, T'mach wel dat ghy niet en siet,
[pagina 9]
Ick gheloof het nochtans niet. Die daer woonen in de Cuylen En in die Bosschagien dicht, Die en connen uwen schicht Noch u Pijlen niet ontschuylen, T' mach wel dat ghy niet en siet Ick gheloof het nochtans niet. Die daer duycken in die stroomen, Brengt ghy oock in Liefdes perck, Is dat blinde Lieden werck? T'is dat ick niet derve noemen, T'mach wel dat ghy niet en siet, Ick gheloof het nochtans niet. Hebdy niet de smalle paden Nae den Hemel opwaerts heen Sonder Leydtsman connen treen, En den donder-Godt verraden? T'mach wel dat ghy niet en siet, Ick gheloof het nochtans niet. Daer nae ginck hy Pluto kiesen, Die daer woont int helsche Rijck, Duyster, diep, afgrijselijck, Daer die siend' hem soud' verliesen, T'mach wel dat ghy niet en siet, Ick gheloof het nochtans niet. Maer ghy wilt geen clachten hooren Van dien die ghy hebt ghewondt, En nochtans wel helpen condt, Maer laet haer in druck versmooren, Daer uyt ick veel eer gheloof, Dat ghy zijt gheweldich doof.