Den blijden-wegh tot Bethleem voor de Christelijcke jonckheyt
(1645)–Anoniem Blijden-weg tot Bethleem voor de Christelijcke jonckheyt–
Auteursrechtvrijvermeerdert met vele nieuwe leysenen, lof-sanghen ende gheestelijcke liedekens
[pagina 203]
| |
Op de wijse: Aue der maeghden Croone.
O Heer ick mach wel klaghen
En schreyden dach en nacht,
Dat ick soo all'mijn daghen
O Heer u heb veracht:
Och had ick dit wel bedacht!
En van sonden my ghewacht:
Want groot is uwe macht.
V dienaer wilt ontfermen,
Die hem soo ontgaen,
Aenhoort sijn bitter kermen,
Hy roept u Vader aen:
Met den armen Publicaen
Voor sijn borste kompt hy staen,
Wilt hem als een kindt ontfaen.
O Heere van hier boven,
Wilt mijns ghenadich zijn,
Ick sal u altijdts loven,
Weert van my t'helsch fenijn:
Daer en is gheen meerdere pijn,
Van de derven u aenschijn,
O hemelsch' Medecijn:
| |
[pagina 204]
| |
O Heer ick sal sterven
En zijn in grooten noot,
En wil my niet bederven,
Al zijn mijn sonden groot:
Laet my doch door u bloet root
(Al ben ick van deughden bloot)
Ontgaen de tweede doot.
Wilt my u gracy' gheven
En maeckt my dus ydoon
T'ontfanghen in mijn leven
Al die pardoenen schoon:
Om te krijghen goeden loon,
En hooren den schoonen thoon,
Komt Bruydt ontfanght de kroon.
O Iesus hoogh gheboren,
Ghy sijt ghebenedijdt,
En laet my niet verloren,
Noch heel vermaledijdt,
Die in't Vagheviers ghekrijt
Suyveren nu haer habijt,
Om 't eeuwigh schoon jolijt.
Ick wil my gaen begheven
Tot alle deught voorwaer,
Eer ick worde verdreven:
Paulus leert openbaer,
Datter een vier is hier naer
Het welck maeckt de ziele claer,
En lost de sonden swaer.
|
|