Den blijden-wegh tot Bethleem voor de Christelijcke jonckheyt

vermeerdert met vele nieuwe leysenen, lof-sanghen ende gheestelijcke liedekens

Een ander Van de liefde Godts.

Op de wijse: Een Ridder en een Meyskens jonck.

S Morghens vroegh inden dagheraet
Verliet ick al mijn ruste,
Om een die in't herte staet,
Ick socht hem met groot luste.

Ick socht hem maer ick vondt hem niet,

Mijn herte was vol rouwe
Ick gingh vol druck en groot verdriet
Door soo menigh landouwe.

Al waer ick quam had hy gheweest

Hy scheen voor my te vluchten,
Ick voede mijn benouwen gheest
Alleen met deerlijck suchten.

[p. 201]

 

Ick besweer u ghy dochters schoon

 

Van Syon hoogh ghepresen,

 

Indien ghy vindt mijn lief ydoen,

 

Soo wilt mijn boden wesen.

 

Seght hem dat een die hy bemindt

 

Is soo benouwt van binnen,

 

Soo sy by hem gheen troost en vindt

 

Sy sterft van reynder minnen.

 

Nu antwoort ons o jonckvrouw teer

 

Die ons dus comt besweeren

 

Hoe danigh is die schoon jongh Heer

 

Daer nae staet u begheeren.

 

Hy is van clare witheyt root,

 

Als die de Wijn-pers treden,

 

Hy heeft voor my al tot der doot

 

Soo vromelijck ghestreden.

 

Sijn vader regeert s'hemels throon

 

Sonder eynde oft beginne,

 

Sijn moeder is een jonckvrouw schoon

 

Dese ist die ick beminne.

 

Hy is een Ridder sonder blaem,

 

Al doet hy my dus weenen,

 

O dochters nu hoort sijnen naem,

 

Iesus van Nazarenen.

 

Nu laet ons gaen ten cruycen baen,

 

Daer plachmen hem te vinden,

 

Daer sult ghy oock wel haest verstaen

 

Nieuw maer van uwen beminden.

 

Doen ick des cruycen baen in trat

 

Met een soo vromen moede,

[p. 202]

 

Daer van d' ick mijn lief op het padt

 

Gheheel bedeckt met bloede.

 

Och zijt ghy dit mijns herten lief

 

Cieraet des hemels throone,

 

Wie heeft ghedaen dit ongherief

 

Aen u edel persoone?

 

Voor u was ick gegaen ten stijd',

 

O vyandt is verslaghen,

 

Ick acht seer weynigh wat ick lijd',

 

Om uwe minne te draghen.

 

Nu comt met my reyn Ioncvrou schoon

 

Al tot mijns Vaders stede,

 

Want mijn victorie ende kroon

 

Die gheve ick u oock mede.

 

Adieu adieu gheselschap oude,

 

Ghy en cont my niet vermaecken,

 

Ick wil volgen mijn Bruydegom stout

 

Om tot de kroone te geraecken.