Den blijden-wegh tot Bethleem voor de Christelijcke jonckheyt
(1645)–Anoniem Blijden-weg tot Bethleem voor de Christelijcke jonckheyt–vermeerdert met vele nieuwe leysenen, lof-sanghen ende gheestelijcke liedekens
Op de wijse: Ian de Nivel, &c. (oft) Lest ginck ick my vermaecken.
HOe vremt zijn u ghenaden,
Hoe wonder zijn u daden,
Mijn kindt en t'samen Heer!
Wat doet ghy my aenschouwen,
My, boven alle vrouwen
Door u gheluckigh seer.
| |
[pagina 42]
| |
Ick sien (wie sal't verveelen)
Een kinders rol u speelen,
'T toneel is mijnen schoot.
Ick sien daer heel verwondert
Dat ghy, die boven dondert,
Hier deerlijck schreyt uyt noot.
'K moet u in doeckxken binden,
V ermkens over-winden,
Als of ghy niet vermocht.
Ick moet u dickwils wieghen
Die door u macht doet vlieghen:
De voghels inde locht.
Ick moet u gaen ghewennen
Als kindt te leeren kennen
Mijn maeghdelijcke borst:
Daer ghy die self doet groeyen,
En't sogh daer in doet vloeyen:
Versaedt daer uwen dorst.
O machtich Heer der Heeren
Dat ghy van my wilt leeren
Op uwe voetjens staen!
O Schepper onghemeten,
O drayer der Planeten,
Moet ick u leren gaen?
Ghylaet u leeren spreecken
Die tonghen om te preecken,
Die gheeft en roert al om,
Ghy leert van my pa, paken,
En segghen nu ma, maken;
Of anders blijfdy stom.
| |
[pagina 43]
| |
Met lach en kinder-trecken
Sien ick u, Godt, bedecken
V Groot moghende verstandt
Ick sien u soetjens springhen,
Als ick beghin te singhen
En heb u by der handt.
Gh' en wilt quansuys niet weten
Mijn vreughden onghemeten
Die ghy my Liefste jont,
Als ick mijn lust mach blussen
Met u dickwils te kussen
Aen uwen soeten mont.
Dan gaet ghy met my spelen,
En boven alle velen
V Moeder ghy vermaeckt.
Comt lieflijck my bekijcken,
Mijn wanghen overstrijcken,
Dat 't hert in liefde blaeckt.
Heel slecht is al u wesen,
Waer in men claer kan lesen,
Dat kindtsheyt ghy bemint.
Heel simpel zijn u ooghkens,
En alle u vertooghkens
Van een onnoosel kint.
O Soon, ghy moet wel haten
Vernedert boven maten
Der wereldts hooverdij,
Die u soo slecht comt draghen
In alle uwe daghen
Verniet aen alle zy.
|
|