Berliner Liederhandschrift vom Jahre 1568

[fol. 58v]

[99]

Ein annder

Schons lieb ich bin dir trew vnnd holtt,
aůß gantzem meinem hertzenn,
Woltt gott das mirs gebůrenn soltt,
mitt dir frůndtlich zů schertzenn,
nichtt liebers aůff erdt,
mein Jůnges hertz begertt
dan dein freůndtschafft zů erwerbenn,
Desto frolicher woltt ich sterbenn.

Dů sollstt mein gemůett nichtt verachten,
Du schones megdlein rein,
Vnnd mein gůnst dů betrachtenn,
Dweill ich dich fůr all gemein,
hab aůßerkorenn,
nitt laß sein, verlorenn,
vergeltt lieb mitt trewenn,
Daß soll dich nitt geraůwenn.

Sprich zů mir ein freundtliche redde,
das mein hertz trost befinde,
vnnd mein schmertz sich verker zů freůdt,
Dir will ich mich eweglich verbynden,
Der diener dein,
Zartt liebste mein,
vor meines lebens ende,
will ich von dir nitt wendenn.

[Spreuk]

Sůchten vnnd clagenn
Machen mich altt jn meinen Jůngen Jairenn.