Berliner Liederhandschrift vom Jahre 1568

[84]

Ein annder

Nye grosser leb mir zů handenn kam,
vonn wůnderlichem schertzenn,
Dardůrch mein gemůtt jn freůdenn schwebtt,
vnnd frewett sich jm hertzen,
tagh vnnd nachtt,
kůrtz vmb bedachtt,
bin ich gantz vnůerdrossenn,
zů aller zeitt,
ohn wiederstreitt,
threib ich mein schwencktt vnnd bossen.

Freundtlicher weiß, vnnd kůrtzweill vill,
hab ich nehe mehr gesehenn,
Singen sagenn vnnd ander spill,
ich will ir gůitz verjehenn,
mitt hertz vnnd můndt,
aůß rechtem grůndt,

[fol. 51r]

 

dweill ich hab das leben,

 

sie ist der artt,

 

gantz woll vngespartt,

 

Jr trew will sei mir gebenn.

 

 

 

Och traůwes hertz vnnd weiblich zůchtt,

 

soltt ich bei dir pleibenn,

 

So wertt gewendtt verlangens sůchtt,

 

vnnd dorftt nitt briefflein scheibenn,

 

Jetz hin dan her,

 

vnnd weiß nitt wehr,

 

vnnß beidenn mochtt versagenn,

 

hett ich die wall

 

gantz vberall

 

ich woltt nitt weiters fragenn.

[Spreuk]

Nemantt aůff erdenn so woll thoitt
Das eß iederman důncktt sein gůitt.