Berliner Liederhandschrift vom Jahre 1568

[fol. 28v]

[45]

Ein annder

Stettig dů bist die hochste kron,
Die ich jn meinem hertzenn trag :/:
Jch nemb das theůr aůff meinenn eidt,
wie selden ich eß jemantz clag,
Mein hertz brendt sich jn des feůres glott,
Gebůnden mitt Venůs bendenn,
Das ich mich vonn dir scheidenn mos,
Das thůitt meinem hertzenn ellendtt.

Sůnder dich kan ich nitt frolich sein,
Geraůwenn offt gerůstenn :/:
Fraw Venůs brengtt mich jnt verdreiß,
wie sal mich freůdenn gelůstenn,
Wen ich gedenck der wiederfartt,
och mochtt ich sei vmbfangenn,
Vnnd kuissenn sei fůr jrenn roter můndtt,
Darnach steitt mein verlangenn.

Scheidenn so will ich nhů noch nymmer meher,
von dir dů allerliebste mein :/:
Dů hast gefangenn hertz můtt vnnd mein Syn,
Dein diener ich will pleibenn,
Hertzliebste mein, Getraw dů mir,
vonn dir will ich nitt weichen,
Jch weiß kein lieber lieb dan dich.

[fol. 29r]

 

Jn Theůtsch vnnd Welschen reiche.

[Spreuk]

Beider will,
Schafft vill,
Der liebster will,
Das ist mein zill,
Daraůff ich tracht
Bei tagh vnnd nachtt
Biß das ich hab
Das mein hertz lab
So stůndtt ich fast
Mein hertz hett rast,
Des sei gemachtt
Zů guetter nachtt
Mein trewer dienst, stette frůndtschafft
Sei eůch zůgesagtt
Jn ewernn hertz gegossenn,
Wie ein Kern jn ein Apffell verschlossen.