¶ Een ghenoechlijke vraghe vander vrouden des ewighen leuens.
ALs die salighe sielen al de vrouden besitten in oueruloedicheyt. Soe vraghen si horen schepper segghende. O onse god nu en weten wij gheene vroude die wij bedencken moghen wi en zijnder mede begauet. ende oeck zijn veel blijschappen in desen boecke beschreuen. Mer noch isser een vroude die niet achter ghelaten en dochte. dat welcke verurouwet dat dat hemelsche gheselschap ende maecse droncken mit ontsprekeliker ghenoechten. dat is toe aenschouwen der hemelscher coninghinnen godlike claerheyt. Deze vroude is den vrienden gods also groet ende onsprekelick dat al die heilighen hem daer af verbliden. Wie soude moghen dencken wat blijschap dattet is. die moeder der ontfermherticheyt Dye coninghinne der ghoedertierenheyt toe aenschouwen mit horen ghebenediden kinde Niet als dat kint schreyede inder cribben doe hi gheboren was Mer als een ghenoechlick schepper aen te schouwen in zijnre godheyt. Die coninghinne des hemels is alsoe wonderlick aen te schouwen dat gheen tonghe dat vutspreken en mach. noch gheen penne dat bescriuen en mach. noch gheen herte dat bedencken en mach wat vroude dat den ghebenediden is. dat godlike aensichte der moeder gods aen te schouwen.
Het is wel reden dat hem die heylighen hier in verbliden. want si is die godlike moeder der ontfermherticheyt. ende ouermits horen ghebeden ende hoer hulpe zijn veel zundighe menschen ghecommen tot beteringhe der zunden.
Dat dit waerachtich is betuyghet ons die heylighe scrift tot menighen steden.
§ Die heylighen verbliden hem oeck int aenschouwen der coninghinne des hemels want si voertghebrocht heuet god den schepper des hemels ende der eerden ende in hoer heuet gherust die heylige drieuoudicheyt. ¶ Item twierhande vroude hebben die wtuercoren vrienden godes int anschouwen der hemelscher coninghinnen. ¶ Ten eersten want si den hemel ontsloten heuet. die menich dusent iaer ghesloten hadde gheweest. dat gheen mensche soe rechtueerdelicke noch soe heylichlike leuen en mocht dye int ewighe leuen comen mochte. Ende deze banden zijn ontsloten ouermits de moeder gods want nae dat si xpristum ter werlt ghebracht had waert die poerte des ewighen leuens gheopent.
§ Ten anderen mael verbliden hem die maechden in hoer ionferlike reynicheyt want si blincket van onbesmetter ende claerre reynicheyt schoenre dan die sonne als sinte Bernardus seyt. Ende daer omme begheerde xpristus van hoer gheboren te werden ¶
Auteursrechtvrij