Ars moriendi

§ Hoe alle quade kersten menschen gedaecht zullen werden te comen voer dat oerdel godes

DAer na sal die richter to hem doen comen. alle kersten menschen. Ende sal to hem spreken in veruerrliker toernicheyt segghende. V boescheyden zijn voer mi ghemenichuoudicht ende v zunden hebben v gheantwoert. v handen zijn beulect van bloede. ende v vingeren mit boesheyden. ¶ V lippen hebben loghentale ghesproken. Waer omme hebstu gheblasphameert ende ghezundighet teghens god. ¶ Siet die kennisse dijns aensichtes sal di antwoerden.

Want ghij hebt v zunden ghekundicht ghelijck die zunde van zodome. we we uwer sielen. want v veel quaets ghegeuen sal werden ¶ Ende dan zal hi hem keren totten richteren ende sal segghen. Wee u richteren die den bosen doer gauen gherechtueerdicht hebt. waer omme hebstu mijn rechtueerdighe wet. ende mijn goede rechten te coep ghemaect.

[fol. 83r]

§ Item die strenghe richter sal seggen totten ghenen die houeerdelick gheleeft hebben. O ghi houeerdighe mannen ende vrouwen ick sal v nu doen versincken in dat diepste der hellen

¶ Item in groten toerne sal hi segghen totten ghewijden nonnen die hoer reynicheyt niet bewaert en hebben. Waer omme hebstu ouerspel ghedaen in mijn heylighe sacramenten. Die borsten dijnre reynicheyt hebstu beulect. Ende dat noch quader is ghi hebt voertgebrocht sonen ende dochteren ende hebt beestelike onreynicheyt bedreuen. Ghi en zijt niet ghelijck lichte vrouwen die omme gheldes wille ouerspel doen. Mer du biste noch veel quaeder. Want du en hebste niet allen dijn oerden te broken. mer du hebste oeck den ghenen ghedoet die mit v heeft ghezundighet. Ende daer om sal ick v verscheyden van mijnen ghebenediden vrienden. ende die helsche woluen sullen v verslinden. Gaet tot mijnder luchter siden