Ars moriendi

§ Hoe die weerlike richters ghedwonghen sullen werden ten oerdel te comen.

ALs dit gheschiet is doe sal hi doen roepen die coninghen. hertoghen princen ende ander heren die beueel ouert volck ghehadt hebben. Ende tot dezen sal hij seggen O ghi princen heb ick u niet vutuercoren ghehadt bouen anderen menschen. want ick verheffede v boen anderen menscen Waer omme en hebt ghi v hoecheyt ende v edelheyt niet wijsselick ghebruket. Hoe hebstu ouer mijn volck gheordelt.

§ Die keyseren ende coninghen sullen antwoerden. Wi hebben rechtueerdelike iusticie ghegheuen

§ Dan sal die richter antwoerden. Hoe hebt ghij dye heylighe wet veruult. Hebben die kinder in v teghenwoerdichteit hoer vader ende moeder niet versmaet. Waer omme en hebstuse niet ghecorrigeert als dij beuolen was. ¶ Item waer omme hebstu die armen verdruct. Weduwen ende weezen bedroeft. Altoes zijnder onder v gheweest verradenissen ende bezweringhe. Die zielen uwer ondersaten hebt ghi verslint. ¶ Waer omme en hebt ghi v volck niet ghecorrigeert die mijn wet ende mijn gheboden onder hoer voeten getreden hebben. Siet ick coninck der coninghen ende heer der heren werde beulecket int middel van v

[fol. 82v]

Ende al deser ghelijcken zijn ghesciet in v rijcken. want ghi waert ghelijc woluen. Ende want ghi gierich gheweest hebt daer omme sal ick u laten vergaen inden vuer mijnre toernicheyt

¶ Dan zullen die coninghen antworden. Alre rechtueerdichste richter. Het is waer wi bekennen dat ghi ons gheset hebt omme v volck te regeren. Mer rechtueerdighe richter. wilt ons doch horen. wi hebben v volck berispet van horen misdaden die openbaer waren. Mer dat zij heymelick ghedaen hebben waer omme wijt ghi ons dat.

§ Hier op sal die richter antwoerden Soe niet ghi bosen soe niet. hebt ghij v rechten niet tot onrechte ghemaect.

Want ghi hebt den ghenen recht ghegeuen die rijck waeren alleen omme gheldes wille die nochtans onrecht hadden. Mer ghi hebt die armen verdruct. ende hoer goede recht hebstu verwandelt in onrechte. omme dat si v gheen ghelt en hadden te gheuen.

§ Dus want ick v grote dominacie. ende heerlicheyt ghegeuen hebbe bouen mijn volck ende grote rijcdommen. ende ghi nochtans mijn gheboden ende mijne wet onder u voeten ghetreden hebt. ende mijn heylighe insettinghe verworpen hebt. Daer omme en zijt ghi niet weerdich onder mijn volck ghetelt te werden.

¶ Mer ick sal den duuelen macht ouer v gheuen v te tormenten. ghelijck als ick v macht ghegeuen had ouer mijn volck omme dat te corrigeren in zijn boesheyt ende ghi dat niet ghedaen en hebt. Daer omme gaet haestelic tot mijnre luchter siden.