§ Die blijscappe der gheenre die oetmoedich gheweest hebben
DIe ghoede menschen die hem seluen cleyn gheacht hebben. ende hem niet verhoueerdicht en hebben. die sullen verheft werden ende gheloent werden mitten wtuercoren vrienden gods ¶ Voert soe vintmen in veel anderen boecken bescreuen hoe een yeghelike doghede gheloent wordt dat nu te langhe is te vertrecken ende te veel is af te scriuen. Wantmen scrijft van menigherhande wonderlike cierheyt des ewighen leuens wat wonderliker ghenoechte ende blijschap dat inden ewighen leuen is.
Mer men mach nochtants dat dusenste deel niet scriuen. want die vroude des ewighen leuens en heuet ghene ghelikenisse bij enighen dinghen. noch gheene mensche en is soe verstandel noch oeck soe wijs dat hi dat alre minste deel vander alre cleynster vrouden des ewighen leuens begripen mach
§ Hier salmen op weten als te voren van die pijne der hellen gheseyt is ende ghelikerwijs alsmen die minste vroude des ewighen leuens niet en mach bescriuen. alsoe en mach men oec niet wtscriuen die minste pijne der hellen. Mer wantmense niet wtspreken en mach of datse die mensche niet volcomelick verstaen en mach. daer omme heft god de here den menschen veel schoender exempelen ende miraculen gheopenbaert op dat die menschen volcomelick ghelouen moghen al die vroude des ewighen leuens ende al die pijnen der hellen ghelikerwijs als men in dezen boecke menich schoen exempel beschreuen vint. Ende oeck menighe schone leere die de heylighe doctoren ende leerders beschreuen hebben tot onzer zalicheyt. Ende hier omme ist van groeten noden wanneer wi deze scriften gheleesen hebben ofte hebben horen lezen. dat wij dan sorchuoudich zijn te ouerdencken die pijnen der hellen. ende die vroude des ewighen leuens. want al onse saelicheyt hanghet aen deze twee toe ouerdencken.