§ Dat goede ingheuen des heilighen enghels teghen die vermetenheyt.
DIe heylighe enghel die en laet nummermeere af. den siecken mensch te troosten Als dan die duuel den sieken mensche becoert in vermetentheyt. Soe comt die heylighe enghel. ende troest den siecken mensche segghende. O mensce vermeet v niet in v vaste gheloue. In v hope. noch in v lijdsaemheyt. want du en hebste niet goedes van die seluen dan van gode. Als ons here ihesus xpristus selue seyt in sinen heylighen euangelio. Sonder mij en machstu niet doen ¶ Voert en salstu die seluen niet toegheuen. datstu goet ende heylich biste. want van v seluen en hebbestu niet dan ghebreck. Want god die here seyt ¶ Bistu nyet ghelijck eenen cleynen kinde. du en mogheste niet comen int rijcke der hemelen. Dat is die hem meer verheffet dan een cleyn kint die en mach niet salich werden. Hier omme en verheffe vmmers v seluen niet op datstu niet vernedert en werdeste. mer vernedert v seluen ende du sulste verheffet werden. als ons here selue seyt. Sinte Augustinus seyt. Vernedert v ende god sal tot v dalen. mer verheft ghi v seluen god sal van v vlien O mensche ghedencket hoe bi dese sunde die schoenste enghel is gheworden. die lelicste duuel ende most dalen vander hoechster vrouden in die diepste pijne. Want als sinte Bernardus seyt so is die houerdije een beginsel daer alle zunden wt spruten. Voer seyt hij. Schuwet die houerdije ende dan sulstu die ander zunden te lichter achter laten mogen
§ Als die siecke mensche aldus wort ghetempteert soe sal hi ouerdencken dat gode gheen sunde also seer en mishaget als dese sunde. Wantmen mach sien. hoe menighen mensche dat god omme dese sunde gheplaghet heeft. Voert soe sal hem die siecke mensche veroetmoedighen ende ouerdencken zijn sunden. want hi en weet niet oft hi in die liefte dan in den toerne godes staet. Hij sal oeck exempel nemen aenden heylighen vader. sinte Anthonius daer die duuel toe seyde. O anthoni. du hebste mij verwonnen. want als ick v wil verheffen. soe vernedert ghi v. Ende als ick u wel vernederen soe verheffet ghi v. Daer nae sal die siecke mensche dencken hoe hem god die vader veroetmoedicht ende vernedert heuet doe hi sinen ghebenediden sone senden opter eerden. die omme onzen wille den bitteren doot leet aen die galghe des cruces. ende hoe oetmoedich dat hi in sinen lijden was. Ende mit aldustanighe ghedachtenissen mach dye siecke mensche wederstaen alle die quaede becoringhe daer die duuel den siecken mensche mede tempteert.
Auteursrechtvrij
