Ars moriendi

§ Hoe die verdoemde sielen niet alleen gode mit sinen heylighen ende mit alle menschen en vermaledien. Mer hoe zij hem zeluen oec veruloecken ende vermaledyen.

ALs al deze vermaledijnghe gheschiet is. So vermaledijt die verdomede siele haer seluen segghende. Vermaledijt moet ic zijn inder ewicheyt. want ick ouermits tijtlick ende verganclick goet ende omme ere ende omme ghenoechten. ende omme cierheyt ende omme houeerdicheit hebbe mi seluen ghebrocht in dese ongenadighe pine. ende om dat ick mijn vleyschelike ghenoechte nae volghede. daer omme bin ic in dit onlesschelike vuer gecomen ¶ Vermaledijt moet zijn mine oren daer ick dat woert godes mede ghehoert hebbe dat ic weder omme van mi gheiaecht hebbe ende daer nae niet ghedaen en hebbe. want hadde ick gedaen alsmen mi predicte ick en waer in desse onsprekelike pine niet ghecomen. ¶ Vermaledijt moeten wezen mijn oghen. daer ic dat heylighe sacrament dat lichaem ende dat bloet xpristi mede aenghesien hebbe onweerdelick. want ic wist wel dat god omme mijnen wil ghestoruen was ende dat hi zijn duerbaer preciose bloet omme minen wil ghestort hadde. Ick wist oeck wel dat hi waerachtelicke in die hostie des brodes besloten was dat ick mit minen sundighen ogen daghelix aenschouwede. Ende want ick dit wel wist ende mijn quade zunden nochtans niet laten en woude. daer omme bin ik in dit anxtelike gat der hellen ghecomen. ¶ Vermaledijt moet wezen minen mont daer ick dat heylighe sacrament mede in zunden ontfanghen hebbe. Ende daer ick mede ghezworen hebbe bijden wonden ende bi dat liden godes. ende daer ick oec mede ghesproken hebbe oncuusche woerden ende veel ander leliker sunden. Want dit is een oersake mijnre ewigher verdoemenissen.

§ Vermaledijt moeten zijn mijn handen. daer ick onschemelick mede hebbe ghetast daer ick andere menschen ende mi seluen mede tot onkuuschen ghedachten ende wercken ghebracht heb. want hadde ick also onschemelicken mit mynen tasten niet gheweest ick en waer in die grote sunden niet ghecomen.

§ Vermaledijt moet zijn minen buyc die ick nummermeer vol ghenoch ghestoppen noch gheproppen en mochte. want ick liet mi duncken wanneer hij

[fol. 56v]

niet vol costeliker spisen ende dranckes en was so en mochte ick niet gheleeft hebben. ende wanneer mijn buyck aldus onmanierlicke bouen maten vol ghestopt was soe dede ick menighe sunde hadde ick soberlick gheweest in eten ende in drinken ick en hadde in dese ewighe verdoemenisse ende in dese grote pine niet ghecomen. ¶ Vermaledijt moeten wesen mijn voeten daer ick traech mede hebbe gheweest te gaen totten dienste godes ende totter heyligher kercken. Want ick ghinc lieuer tot dansen ende to ydelen spelen. dan in die heylighe kerke. Ick sat oeck lieuer inden tauernen. dan ick dat woert godes hoerde. ende hier omme bin ick gheloent met die ewighe pine

§ Vermaledijt moeten wesen alle mine leden daer ick mede ghesundicht hebbe ende die mij in dese onsprekelicke pijne ghebracht hebben. Mit recht mach ic mi seluen vermaledien want ic bin die ghene die mi seluen aldus iamerlick bedroghen hebbe. ende dat ick in dese onsprekelike pine ghecomen bin dat heb ic mi seluen ghedaen mit minen quaden stinckenden zunden. ende daer omme bin ic weerdich dat ick ewelick ende vmmermeer van den wreden duuelen ghepinicht sal werden sonder enighe barmhertigheyt