Ars moriendi

¶ Wat grote quaet dat van dezen dansen comt leestmen een gruwelick exempel.

[fol. 54r]

HEt gheboerde eens op een tijt dat ionghe ghesellen den bal sloeghen mit coluen bij enen danse. Ende doe een van hem den balle slaen soude. doe ontghenc hem die colue ende vloech in eenre vrouwen hoeft dye aenden danse ghenc. ¶ Deze vrouwe plach altoes te dansen ende te singhen ende te springhen. ende in anderen ydelen spelen hadde si al hoer ghenoechte gheset. Die heylighe ghetiden ende dat ampte ende den dienst der heyligher kercken plach si mit aldustanighen quaden onbetaeme den spelen te versumen. Mer ock leider si waert daer omme gheplaecht mitter ewigher verdoemenissen.

§ Wat gheschiede. doe si mitter coluen int hoeft ghewont was. worden die ander menschen zeer verueert. ende liepen totten wiue. ende als si saghen dat si doot was brochten si dat dode licham mit schreyen ende mit wenen ende leident op die baer dat te voren zeer blide ende vrolick vut ghegaen was. ¶ Ende doe de priester mitten clercken daer was ghecomen omme vigilie te singhen ouer dat dode lichaem. Nu siet een wonderlick dinck hoe god die menschen dicwijlen waernt op dat si exempel aen aldustanighen menschen nemen sullen. Doe die priester begonde te singhen quam daer int huus lopen een verueerlick duuel ende was gheschapen ghelickerwijs oft een zwart verueerlick stier hadde gheweest ende hadde grote langhe verueerlike hoernen op sinen hoefde. ende belcte ende gheberede oft die duuel gheweest hadde. alst doch was. hi stiet die baer omme ende werp dat dode licham dat daer op lach op die eerde. ende schoerde dat licham van lede te leden aen stucken dat hem die darmen aen die hoernen bleuen hanghen.

§ Doe quam daer also groten onuerdrachliken stanck dat gheen mensce bij dat huus en mochte dueren. ¶ Die priester waert seer verueert. ende liep wt den huse mit alleden volcke dat daer in was ende lieten dat dode lichaem also ligghen te schoert ende te reten tot des anderen daghes toe. ¶ Des daghes daer nae doe die stanck een wenich verleden was quamen die vrienden omme te besien hoet mitten doden lichaem was. doe vonden si alle dat ghebeente ende dat vleysche van een ghestroyt. ende die darmen waren al dat huus doer ghestroyt Doe vergaderde si dat ghebeente. ende groeuent op dat velt onder die beesten. ende niet als een kerste mensche. want die priester en woude nyet hebben datmen dat vermaledide lichaem op die ghewijde stede onder den goeden ghelouighen menschen begrauen soude.

¶ Och lieue mensch dencket hebben die duuelen aldus onghenadelic mit den lichaem omme ghegaen. hoe onghenadelic moeten si dan mitter sielen omme gaen in die ewighe verdoemenisse.

§ Och wat ellendigher iamerlijcker

[fol. 54v]

dansen moet hoer siele in die helle dansen.

§ Dese ende dezer gheliken vintmen tot vele plaetsen beschreuen hoe menich mensche dat god omme deze zunden gheplaghet heuet beyde inden ouden testamente ende inden nyewen dat te veele is af te schriuen. ¶ Men en vint oeck dat sommighe menschen op een sterke brugghe dansten die op een water stont. ende die brugghe versonck ende al dat volc verdranck dat opter brugghen dansten ende versmoerden alsoe in horen sunden