Ars moriendi

§ Hoe dat die mensche naket gheboren is ende weder omme naket vander eerden scheyden moet

GHedencke doch datter staet ghescreuen in iobs boeken. Naket bistu gheboren. ende naket zalstu weder omme van hier scheyden Want al bistu rijck al hebstu groet goet ende scat men zals dij nyet mede gheuen wanneer du sterfste. mer dijn vrienden zullen dat besitten Ende en zullen di niet meer medegheuen dan den armsten mensche van dezer werlt. ¶ Och men vint menigen mensce die sine sinnen anders nerghens op en set dan omme groet goet te vergaderen ende costelijcke rijcdommen bij een te rapen. ¶ Och leyder dese menscen hebben die rijcdomme ende die scat voer horen god. Iae si en vraghen nae god. noch oec naeden duuel wanneer si scat ende groet goet vergaderen moghen

Sij en sien oeck somtijdes niet an oftet rechtueerdich of onrechtueerdich wort vergadert. Sij dencken tis alleens wanneer zijt bi malcanderen rucken ende plucken moghen

¶ O vermaledide scat o onsalige scat o duuelike scat. o scat daer die mensche ewelick omme verdoemt moet wezen. Och dese menscen en dencken niet dat die heylighe apostel sinte paulus seyt.

¶ Wij en hebben op dezer werelt nyet ghebrocht. noch wi en sullen van dezer werlt niet weder omme mit ons nemen Recht oft hi seggen soude. O gyerighe mensce waer omme vergaderst u groot goet want al haddestu al die scatte der werlt vergadert alstu sterueste so moetstu en vmmer opter eerden laten

§ Die wijs man Salomon spreeket den rijcken man toe zeggende. O ghierighe mensce wie sal dat besitten datstu beaerbeyt hebbeste. Recht of hi segghen zoude. Du en weetste niet wye dat besitten zal datstu met rucken ende mit plucken aldus neerstelike vergadert hebste. Want du en weetste niet wie dattet verteren zal weder dijn vrienden of dijn vianden. ¶ Ons lieue here ihesus xpristus seyt oeck een gruwelick woert van gyerighen menscen daer aldus ghescreuen staet. ¶ Het is moeghelicker een cameel dat is een groet beeste. doer een oghe van eenre naelden te gaen dan dat een ghyerich mensche zoude comen ten ewigen leuen. Een ghierich mensche en begheert dat hemelrijcke niet. daer omme en sal hem die vroude ende die blijscap des ewighen leuens nummermeer ghegheuen worden. Recht of hi seggen soude Die gierighe menscen soecken die scat der werlt. si en soecken dye vroude des

[fol. 39v]

ewigen leuens niet. want hoer blijscap ende genoechte hebben si gheset in scat ende in costelijcke rijcdomme. Ende daer om ist ommoghelick dat si zouden comen in die vroude des ewighen leuens. Want die rijcke gyerighe menschen en moghen dat goet niet lichteliken achter laten. eer si die doot daer af scheydet ende dan en laten si die schat noch die rijcdomme niet Mer die scat laet haer want die schat en wil hem niet volghen

§ Tot aldustanighen menschen spreket ons lieue here ihesus xpristus inden heylighen euangelio segghende. Wee wee v rijcke menschen die hier inder werlt uwen troeste hebbet in v scatten ende in v rijcdommen Recht of hi segghen zoude. ghi moechse nu besitten. mer nae dezen leuen en zult ghise niet besitten.